Алматыда республикалық «Таза Қазақстан» бағдарламасы аясында көпқабатты тұрғын үйлердің аула аумақтарында қоқыс жинау және контейнерлік алаңдарды санитарлық өңдеу бойынша ауқымды жұмыстар жүргізілуде, деп хабарлайды aqshamnews.kz
18-24 қазан аралығында «Жарқын күз» экологиялық акциясы шеңберінде 700-ден астам контейнерлік алаңды санитарлық өңдеу, жуу және дезинфекциялау, сондай-ақ 24 747 көше және аула қоқыс жәшіктерін тазалау жұмыстары атқарылады.
Сонымен қатар, аула аумақтарының санитарлық және эстетикалық жағдайын жақсарту мақсатында қолданыстағы контейнерлік алаңдарды жаңғырту және оларды тереңдетілген типтегі контейнерлерге ауыстыру жұмыстары жалғасуда. 2024-2025 жылдар аралығында 2 мыңнан астам жаңа контейнер орнату жоспарланған.
Еске сала кетейік, Алматыда «Алматы – біздің ортақ үйіміз» атты күзгі науқанның циклі өтуде, оның аясында қалада күзгі-қысқы кезеңге белсенді дайындық жұмыстары жүргізілуде.