15 aqpanda Almatyda Keńes áskerleriniń Aýǵanstannan shyǵarylǵanyna 35 jyl tolady.
Bul kún elimizdiń merekelik kúnderiniń tizimine engizilgen. Osy ataýly kúnge oraı qandaı is-sharalar ótkizýdi josparlap otyrǵany týraly Almaty ÓKQ brıfıńinde ardagerler uıymdarynyń belsendileri aıtyp berdi, dep habarlaıdy Almaty-akshamy.kz.
Aýǵanstandaǵy soǵys ardagerleri men múgedekterin úılestirý keńesiniń tóraǵasy Murat Ábdishúkirov 22 296 qazaqstandyq sol soǵysqa qatysqanyn, 929 adam qaza tapqanyn, 19 adam habar-osharsyz ketse, myńdaǵan adam múgedek bolyp oralǵanyn atap ótti. Bes qazaqstandyqqa Keńes Odaǵynyń Batyry, bireýine Halyq Qaharmany ataǵy berilse, Aıbyn ordenine eki adam ıeger bolsa, júzdegen ardager burynǵy KSRO men Qazaqstan Respýblıkasynyń ordenderimen jáne medaldarymen marapattaldy.
«Munyń bári bizge sol soǵys týraly, jerlesterimizdiń erligin umytýǵa quqyq bermeıdi. Óz batyrlaryn qurmetteıtin jáne maqtan tutatyn halyq - uly halyq», - dedi M.Ábdishúkirov.
Ataýly kúnniń mereıtoıy qarsańynda Almatyda birqatar is-sharalar josparlanǵan. Qalanyń barlyq aýdandarynda ınternasıonalıs jaýyngerler qurmetke ıe bolady.
Saltanatty is-sharalar Almatyda 15 aqpanda 28 panfılovshy-gvardıashylar saıabaǵynda saǵat 11:00-de ótedi. İs-shara aıasynda Dańq Memorıalynyń janyndaǵy Máńgilik alaýǵa jáne Aýǵanstanda qaza tapqan ınternasıonalıs jaýyngerlerge arnalǵan eskertkishke áskerı qurmetpen gúl shoqtaryn qoıý rásimi ótedi. Sondaı-aq, áskerı qoıan-qoltyq urys sheberleriniń kórme qoıylymdary men áskerı-patrıottyq án konserti ótedi.
Saǵat 15: 00-de «Alataý» saraıynda Aýǵan áskerı áni men áskerı-patrıottyq án konserti ótedi.
14 aqpanda QR Ortalyq memlekettik mýzeıinde mereıtoılyq kúnge arnalǵan kórme ashylady.
Onyń sózine «Kók baıraq» qoǵamdyq birlestiginiń tóraǵasy Áýez Beısenbaev qosyldy. Ol barlyq ótkiziletin is-sharalar jas urpaqqa olardy tarıhpen tanystyrý úshin qajet ekenin atap ótti. Sonymen qatar, Almaty qalasynyń barlyq oqý oryndarynda jastardyń boıynda patrıotızm sezimin oıatý maqsatynda «erlik sabaqtary» ótkiziledi.
«Aýǵanstannan áskerlerdiń shyǵarylǵanyna 35 jyl tolýyna oraı qala ákimdiginiń qoldaýymen birqatar is-sharalar ótkiziletin bolady. «Alataý» dástúrli óner teatrynda merekelik konsert, avtosherý, sporttyq is - sharalar uıymdastyrylady», - dep atap ótti Á.Beısenbaev.
Almaty turǵyndary atalǵan is-sharalarǵa qatysýǵa shaqyrylady.