Almaty polısıasy áskerlerdiń Aýǵanstannan shyǵarylýynyń 35 jyldyǵyna arnalǵan merekelik shara ótkizdi.
15 aqpanda burynǵy Keńes Odaǵy elderi Aýǵanstannan áskerleriniń shyǵarylǵan kúnin atap ótedi. Bul qaza bolǵan ınternasıonalıs-jaýyngerlerdi aza tutý jáne eske alý kúni, dep habarlaıdy Almaty-akshamy.kz Polisia.kz-ke silteme jasap.
«Jeke quramdy patrıottyqqa tárbıeleý maqsatynda PD bólimsheleriniń qyzmetkerleri dástúr boıynsha Aýǵan soǵysyna qatysýshylarǵa baryp kaıtady. Biz olardy aman-saý kórgenimizge óte qýanyshtymyz. Olar jas qyzmetkerlerge sol kezeńniń egjeı-tegjeıin aıtyp berýge árqashan daıyn. Bul jas polıseılerdiń patrıottyq rýhyn kóteretini sózsiz. Biz óz kezegimizde ardagerlerimizdi qoldaımyz jáne umytpaımyz», – dedi Almaty qalalyq polısıa departamenti bastyǵynyń orynbasarynyń mindetin atqarýshy Erjan Uzabaev.
Sonymen qatar polısıa departamentinde saltanatty shara ótip, oǵan Aýǵanstandaǵy soǵysqa qatysýshylar, otstavkadaǵy polısıa polkovnıgi Ábdiraıym Ahmetov pen otstavkadaǵy ishki qyzmet maıory Murat Ábdúshúkúrov shaqyryldy.
«Almaty polısıasy qatarynda Aýǵanstanda mindetti áskerı boryshyn ótegen polıseıler qyzmet etti. Bul tamasha jaýyngerlik daıyndyǵy men tózimdiligi bar, taǵdyry aýyr qarapaıym adamdar. Olar – óz isiniń kásibı mamandary, Otan aldyndaǵy boryshyn abyroımen atqardy. Búgingi saltanatty sharaǵa aǵa áriptesteriniń erlikterinen úlgi alyp, olardan eń jaqsy adamgershilik jáne kásibı qasıetterdi boıyna sińirýge mindetti jas polıseılerdiń qatysýy tegin emes», – dedi Erjan Uzabaev.
Ashyq aqparat kózderine súıensek, Aýǵan soǵysyna 22 myń 296 qazaqstandyq qatysqan. Onyń ishinde 928 adam qaıtys boldy, 119-y almatylyqtar. Alaıda 19-y áli iz-túzsiz joǵalyp ketken bolyp sanalady. Eki qazaqstandyqtyń súıegi úsh jyl buryn tabylyp, Qazaqstanǵa qaıtaryldy. Almatyda 2300-ge jýyq aýǵan jaýyngeri turady, bir almatylyq aýǵan jaýyngeri habar-osharsyz ketkender tiziminde. Qazaqstanda barlyǵy 15 myńnan astam ınternasıonalıs-jaýynger turady. Soǵys 1979 jyldyń 25 jeltoqsanynan 1989 jyldyń 15 aqpanyna deıin (2238 kún) sozyldy.