Qazaq klassıgi Muhtar Áýezovtiń shyǵarmalarynyń tatar tiline aýdarylǵan kitabynyń taralymy 100 danany quraıdy.
Tatarstan Respýblıkasynyń Ulttyq kitaphanasynda qazaqtyń kórnekti jazýshysy Muhtar Áýezovtiń tatar tilindegi kitabynyń jaryq kórýine arnalǵan ǵylymı-tájirıbelik konferensıa ótti. Onyń týǵanyna 125 jyl tolýyna oraı shyǵarylǵan jınaqqa «Kókserek», «Qarash-qarash oqıǵasy», «Qıly zaman» atty úsh shyǵarmasy engen, dep habarlaıdy Almaty-akshamy.kz Elorda.info saıtyna silteme jasap.
Kezdesýdi ashqan Qazaqstannyń Qazan qalasyndaǵy Bas konsýly Erlan Ysqaqov bul kitaptyń tarıhı murany saqtaý jáne elder arasyndaǵy mádenı-gýmanıtarlyq, tarıhı-mádenı qarym-qatynasty damytý maqsatynda shyǵarylǵanyn atap ótti. Onyń aıtýynsha, Muhtar Áýezov HH ǵasyrdyń kásibı óneri men ádebıetiniń qalyptasýynyń qıyn jyldarynda búkil sanaly ǵumyryn halqyna qyzmet etýge arnaǵan, demokratıalyq ádebıet pen progresshil oıdyń damýyna úles qosqan, Tatarstannyń belgili jazýshylarymen tyǵyz baılanysta bolǵan.
Sharaǵa óziniń 80 jyldyq mereıtoıyn toılap jatqan klasıktiń uly Murat Áýezov qatysty. Belgili mádenıettanýshy, memleket jáne qoǵam qaıratkeri ákesiniń ómiri men qyzmeti, tatar mádenıetiniń kórnekti ókilderimen dostyǵy, pedagog, pýblısıs, aǵartýshy, qazaq mádenıetiniń úsh kórnekti ókili Bilál Súleev, İlıas Jansúgirov jáne Muhtar Áýezovtiń jary bolǵan anasy Fatıma Ǵabıtova týraly aıtty. Murat Áýezov ákesiniń shyǵarmalaryn ózge tilde túsiný qıyn ekenin aıta kele, olardyń tatar tiline tamasha aýdarylǵanyna rızashylyǵyn bildirdi.
Kitapty tatar tiline aýdarǵan Qazan federaldy ýnıversıtetiniń Fılologıa jáne mádenıetaralyq komýnıkasıalar ınstıtýtynyń dosenti Gúlfıa Gaınýllına atalǵan úsh shyǵarmanyń kezdeısoq tańdalmaǵanyn aıtty. Sebebi, 1968 jyly «Qarash-qarash oqıǵasy», 1973 jyly «Kókserek» fılmderi túsirildi.
Fılologıa ǵylymdarynyń doktory, profesor, Tatarstannyń eńbek sińirgen ǵylym qaıratkeri Hatıp Mınnegýlov qazaq jáne tatar halyqtarynyń ejelden kele jatqan jáne tyǵyz mádenı baılanystary týraly aıtty. Ol HH ǵasyrdyń basynda Muhtar Áýezov oqyǵan Semeıde halyqtyń jartysy tatarlar bolǵanyn, qazaq ádebıetiniń bolashaq kemeńger tulǵasynyń qalyptasýyna tatar mádenıetiniń yqpal etkenin eske aldy.
Sharany qorytyndylaı kele, onyń qatysýshylary Muhtar Áýezovtiń shyǵarmashylyq murasy álemdik ádebı prosestiń eleýli qubylysyna aınalǵanyn, qazirgi zamanda da ózektiligin saqtaıtynyn, jazýshy ulttyq mádenıettiń ǵana emes, álemdik mádenıettiń damýyna baǵa jetpes úles qosqanyn atap ótti.
Qazaq klassıgi shyǵarmalarynyń tatar tiline aýdarylǵan kitabynyń taralymy 100 danany quraıdy. Aldaǵy ýaqytta kitap Qazan qalasynyń jáne Tatarstannyń basqa oblystarynyń murajaı, muraǵat jáne kórme qorlaryna túsedi.