Atyraýda balyqtyń qyrylýyna baılanysty sotqa deıingi tergeý bastaldy, dep habarlaıdy Almaty-akshamy.kz QazAqparatqa silteme jasap.
Atyraý oblysynyń mamandandyrylǵan tabıǵat qorǵaý prokýrory Asqat Qasymovtyń aıtýynsha, Qaıyrshaqty aýyldyq okrýgindegi kanal men Bezymánnyı sý qoımasynda balyqtyń qyrylý deregine baılanysty sotqa deıingi tergeý bastalǵan.
Tergeý, QR Qylmystyq kodeksiniń 336-babyna sáıkes, balyq qoryn qorǵaý erejelerin buzý deregimen júrgizilip jatyr.
Keshe, 26 sáýirde, Atyraý qalasynyń mańyndaǵy Qaıyrshaqty aýyldyq okrýgindegi Bezymánnyı kólinde usaq balyqtyń qyrylǵany anyqtaldy. Soǵan baılanysty arnaıy komısıa quryldy.
Jaıyq-Kaspıı oblysaralyq baseındik balyq sharýashylyǵy ınspeksıasynyń basshysy Nurlybek Ǵaısınniń málimetine súıensek, balyqtyń qyrylýyna qaırańǵa shyǵyp qalǵany sebep bolýy múmkin.
Al oblystyq balyq sharýashylyǵy basqarmasynyń basshysy Artýr Sádibekulynyń aıtýynsha, balyqtardyń ýyldyryq shashý ornyna erkin kirýi úshin Qaıyrshaqty okrýgi aýmaǵynan 800 metr kanal qazylǵan. Kanaldyń tereńdigi – shamamen 1 metr. Mamandar Bezymánnyı kólinen qarakóz balyǵynyń 65 keli óli shabaǵyn jınaǵan.
Tabıǵat qorǵaý prokýratýrasy men ınspeksıa mamandary óńirdegi sý aıdyndarynda monıtorıń júrgizip jatyr. Bul oblys prokýrorynyń baqylaýyna alynǵan.