Búgin «Gazprom» reseılik kompanıasy Polsha men Bolgarıaǵa energoresýrstaryn jetkizýdi toqtatqannan keıin, Eýropada gaz baǵasy qymbattady, dep habarlaıdy Almaty-akshamy.kz QazAqparatqa silteme jasap.
Reseılik operator Eýroodaqtyń atalǵan elderinen rúblmen tólem almaǵanyn málim etti. Eýropada gazdyń fúcherstik kelisimsharttary 20%-ǵa ósti.
Osyǵan sáıkes, Eýropalyq komısıa tóraǵasy Ýrsýla fon der Láıen arnaıy málimdeme jasady:
«Biz mundaı senarıge daıynbyz jáne Eýroodaqtyń barlyq múshe elderimen tyǵyz baılanystamyz. Biz balama jetkizilimderdi qamtamasyz etý jáne EO-da gazdy saqtaý jumystarymen aınalysyp jatyrmyz».
Eýropalyq komısıa tóraǵasy Eýropada energıamen jabdyqtaýdy qamtamasyz etý úshin balama kózder qaralyp jatqanyn málim etti.
«Dál qazir gaz boıynsha úılestirý tobynyń otyrysy ótip jatyr. Biz EO-nyń úılesken jaýabyn daıyndaýdamyz. Sondaı-aq, balama aǵyndardy qamtamasyz etý jáne Eýropada energıamen jabdyqtaý qaýipsizdigin qamtamasyz etý boıynsha halyqaralyq áriptestermen jumys isteýdi jalǵastyramyz», - dedi Ý. Láıen.