Memleket turǵyn úıge muqtaj qazaqstandyqtar úshin jaldamaly páter aqysynyń 50%-yn tóleıdi, dep habarlady Almaty-akshamy.kz Indýstrıa jáne ınfraqurylymdyq damý mınıstrligine silteme jasap.
«Memleket basshysy halyqtyń áleýmettik osal toptaryn qoldaý úshin arnaıy baǵdarlama ázirleýdi tapsyrǵan bolatyn. Osylaısha, 18 sáýir kúni biz jaldamaly páter aqysyn sýbsıdıalaýǵa ótinimder qabyldaýdy bastap kettik. Alaıda, buǵan deıin baǵdarlamany 2022 jyldyń mamyr aıynda iske qosý josparlanǵan bolatyn. Atalǵan baǵdarlama otbasynyń árbir múshesine shaqqandaǵy tabysy aıyna bir eń tómengi kúnkóris deńgeıinen aspaıtyn otbasylarǵa jaldamaly páter aqysynyń 50%-yn tóleýdi kózdeıdi. Baǵdarlamanyń operatory - «Otbasy banki», - dep jazdy vedomstvo.
Eńbek mınıstrliginiń aqparatyna sáıkes, búgingi tańda elimizde 590 myńǵa jýyq kezekte turǵan azamat bar, olardyń 210 myńy áleýmettik osal toptarǵa jatady. Olardyń ishinde, tabysy eń tómengi kúnkóris deńgeıinen tómen 70 myńǵa jýyq qazaqstandyq bar. Osyǵan baılanysty Memleket basshysynyń tapsyrmasy boıynsha jeke turǵyn úı qorynan jalǵa alynatyn turǵyn úı úshin tólemderdi taǵaıyndaý qaǵıdalary ázirlengen.
«Ortalyq komýnıkasıalar qyzmetiniń alańynda áriptesterim turǵyn úı tólemderine ótinim berý mehanızmi jáne sýbsıdıalaý qaǵıdalary týraly egjeı-tegjeıli aıtyp bergen bolatyn. Osylaısha, kóp balaly otbasylar, birinshi jáne ekinshi toptaǵy múgedekter, jetim balalar, múmkindigi shekteýli balalardy tárbıelep otyrǵan otbasylar memleket tarapynan qoldaýǵa ıe bola alady. Halyqqa yńǵaıly bolý úshin biz ótinimderdi qabyldaý boıynsha sıfrlyq platformany iske qostyq. Osylaısha barlyq proses otbasybank.kz portalynda onlaın júzege asyrylady. Ótinish berýshilerdiń barlyq talapqa sáıkestigi basqa vedomstvolardyń derekter bazasymen ıntegrasıalaý arqyly tekseriletin bolady», - dedi mınıstr Qaıyrbek Óskenbaev.
Ol osy rette tólemderdi sýbsıdıalaýǵa ótinimder qabyldaý prosesin turaqty baqylaýda ustaıtynyn erekshe atap ótken. Sondaı-aq kúndelikti «Otbasy bankine» kelip túsip jatqan ótinimder boıynsha qanshasy maquldanyp, qansha ótinim keri qaıtarylǵandyǵy jóninde sandardy saralap, monıtorıń jasap otyrmaq.