Qazaqstandyq loýkoster FlyArystan búgin Atyraý – Tashkent – Atyraý baǵyty boıynsha alǵashqy halyqaralyq reısin sátti oryndady.
FS7835 reısi Hıýaz Dospanova atyndaǵy halyqaralyq áýejaıynan ushyp shyǵyp, Ózbekstan astanasyndaǵy Islam Karımov atyndaǵy halyqaralyq áýejaıyna sátti qondy. Ushaq avıasıada jańa baǵyttyń ashylýyn bildiretin rásim – dástúrli sý burqaǵymen saltanatty túrde qarsy alyndy. Tashkentten qaıtyp kelgen ushaqty, ıaǵnı FS7836 reısin Atyraýda dál osyndaı qarsy alý rásimimen kútip alý josparlanǵan.
Alǵashqy reıstiń ashylý saltanatyna áýekompanıasy men áýejaıdyń basshylyǵy, sondaı-aq jergilikti atqarýshy organdardyń ókilderi qatysty.
"Bul reıstiń iske qosylýy FlyArystan-nyń halyqaralyq baǵyttar jelisin keńeıtý jolyndaǵy mańyzdy qadam retinde Qazaqstan men Ózbekstan arasyndaǵy kólik qoljetimdiligin arttyrýǵa septigin tıgizedi. FlyArystan-nyń Astana – Tashkent baǵytyndaǵy reısine qosa, bul jańa baǵyt Qazaqstannyń batys óńirinen Ózbekstanǵa tikeleı áýe qatynasyn qamtamasyz etedi. Bul óz kezeginde eki el arasyndaǵy iskerlik, mádenı jáne týrısik baılanystardyń odan ári damýyna múmkindik beredi", - dedi "FlyArystan" AQ prezıdenti Rıchard Ledjer.
Saltanatty shara aıasynda áýejaıdyń ushý zalynda merekelik bezendirý, fotoaımaq, lenta qıý rásimi jáne jolaýshylarǵa syılyqtar uıymdastyryldy.
:"Tashkentke tikeleı jańa halyqaralyq reıstiń ashylýy – bizdiń áýejaımen qatar búkil óńir úshin de mańyzdy oqıǵa. Bul reıstiń iske qosylýy jolaýshylar aǵynynyń artýyna, áýejaıdyń tranzıttik tartymdylyǵynyń joǵarylaýyna jáne Atyraýdan oryndalatyn baǵyttardyń geografıasynyń keńeıýine yqpal etedi dep kútemiz", - dedi "ATMA – Atyraý áýejaıy jáne tasymaldar" AQ komersıalyq dırektory Vladımır Pahomov.
Atyraý – Tashkent – Atyraý baǵyty eki qala arasyndaǵy alǵashqy turaqty tikeleı reıs boldy. Reıster shilde jáne tamyz aılarynda – beısenbi men jeksenbi kúnderi, al qyrkúıek pen qazan aılarynda – dúısenbi, sársenbi jáne juma kúnderi oryndalady. Ushý ýaqyty - 2 saǵat 20 mınýt.
FlyArystan — Air Astana tobynyń 100% enshiles kompanıasy bolyp tabylatyn qazaqstandyq loýkoster. Ol óz qyzmetin 2019 jyldyń mamyr aıynda bastady. 2025 jyldyń qańtar aıynan bastap FlyArystan óz sertıfıkatymen, FS kody boıynsha táýelsiz áýekompanıa retinde qyzmet kórsetýde. Áýekompanıa Almaty, Astana jáne Aqtaý qalalarynda ornalasqan bazalaryndaǵy zamanaýı A320 ushaqtarynan quralǵan áýe parkimen keń aýqymdy marshrýttar jelisi boıynsha reıster oryndaıdy. FlyArystan marshrýttar jelisi ishki jáne halyqaralyq reısterdi, sondaı-aq charterlik baǵyttardy qamtıdy. FlyArystan 2023, 2024 jáne 2025 jyldary úsh ret Skytrax World Airline Awards tarapynan Ortalyq Azıa jáne TMD-nyń eń úzdik búdjettik áýekompanıasy dep tanyldy.
1930-jyldary Gýrev avıaotrádynyń quramynda qurylǵan H. K. Dospanova atyndaǵy Atyraý halyqaralyq áýejaıy aımaqtyq alańnan zamanaýı halyqaralyq áýejaıǵa aınaldy. Búginde áýejaı ártúrli sanattaǵy áýe kemelerin qabyldaı otyryp, ishki jáne halyqaralyq reısterdi qamtamasyz etedi.
Tashkent qalasynyń Sergeli aýdanynda ornalasqan Ózbekstandaǵy eń iri áýejaı. Bul – Ózbekstan men Ortalyq Azıadaǵy eń kóne ári mańyzdy áýejaılardyń biri. Búginde Islam Karımov atyndaǵy "Tashkent" Halyqaralyq áýejaıy aımaqtyń iri halyqaralyq habtarynyń biri retinde qyzmet atqarady jáne halyqaralyq reıster úshin transporttyq mańyzdy torap sanalady.