Negizgi maqsat - memlekettik qyzmetterdi avtomattandyrý
Bıyldan bastap Sıfrlyq damý, ınovasıalar jáne aeroǵarysh ónerkásibi mınıstrligi jer qoınaýyn paıdalanýshylar úshin etalondyq geoaqparattyq júıe qurýǵa baǵyttalǵan Kaznedra jobasyn usyndy, dep habarlaıdy Almaty-akshamy.kz Inform.kz-ke silteme jasap.
Bul júıe jeke jáne zańdy tulǵalarǵa jer qatynastary men jer qoınaýyn paıdalaný salasyndaǵy aqparatqa qoljetimdilik beretin bolady. Onyń taǵy bir fýnksıasy - osy salalarda kórsetiletin memlekettik qyzmetterdi avtomattandyrý. Bul jobany Sıfrlyq damý mınıstri Baǵdat Mýsın men Ekologıa mınıstri Serikqalı Brekeshev jan-jaqty talqylady.
Qazirgi ýaqytta mınıstrlik jobany iske asyrý boıynsha Jol kartasyn ázirlep, bekitti, jer qoınaýyn paıdalanýshylardyń bıznes-prosesterin avtomattandyrý boıynsha biryńǵaı tásilderdi aıqyndady. Joba birden birneshe vedomstvonyń, sonyń ishinde Ekologıa, geologıa jáne tabıǵı resýrstar, Qorǵanys, Aýyl sharýashylyǵy, Indýstrıa jáne ınfraqurylymdyq damý mınıstrlikteriniń, sondaı-aq jergilikti atqarýshy organdardyń derekter bazasyn qosýdy kózdeıdi. Munda erekshe qorǵalatyn tabıǵı aýmaqtar, jer asty sýlary, gıdrotehnıkalyq, ınjenerlik qurylystar jáne t.b. boıynsha derekter saqtalatyn bolady.
Bul rette, SDIAÓM jobanyń tehnıkalyq bóligin oryndaýdy, onyń ishinde qajetti aqparatty júkteý úshin derekter bazasynyń qurylymyn qurýdy da óz moınyna alady, al sıfrlandyrý jáne aqparatpen toltyrý, sondaı-aq quqyqtyq alańdy qalyptastyrý salalyq memlekettik organdarda qalady.
«Kaz-Nedra platformasy ashyqtyqty qamtamasyz etedi jáne rásimderdi sıfrlandyrý arqyly jer qoınaýyn paıdalaný quqyǵyn berýge baqylaýdy kúsheıtýge múmkindik beredi. Munda jer qoınaýy ýchaskelerin izdestirýden, geologıalyq aqparat pen lısenzıalar alýdan bastap, jer qoınaýyn paıdalanýshylardyń eseptiligin, onyń ishinde salyq tólemderin qalyptastyrý men tapsyrýǵa deıin birqatar rásimderdi júzege asyrýǵa bolady», - dep atap ótti vedomstvo basshysy Baǵdat Mýsın.
Onyń aıtýynsha, platformany engizý jer qoınaýyn paıdalanýshylar úshin biryńǵaı terezede barlyq rásimder men qyzmetterdi shoǵyrlandyrý arqyly ınvestorlarǵa keshendi servıstik qoldaý kórsetýge yqpal etedi