Jetisý oblysynyń polıseıleri 32 jastaǵy áıeldiń ólimine qatysty istiń tergelý barysyn túsindirdi, - dep habarlaıdy aqshamnews.kz tilshisi.
Ne boldy?
Buǵan deıin oqıǵa týraly jýrnalıs Sandýǵash Dúısenova habarlaǵan bolatyn. Qaıtys bolǵan áıel Aızattyń týystary onyń ólimine kúıeýin kinálap otyr. Olardyń aıtýynsha, er adam áıelin birneshe saǵat boıy kishkentaı qyzynyń kózinshe aıaýsyz uryp-soqqan. Aızattyń aýyr jaraqattar alǵany anyqtaldy: bas súıek-mı jaraqaty, súıek synyqtary, denesin súıretken izder. Týystarynyń málimdeýinshe, er adam áıeldi arqanǵa baılap, dalada súırgen, onyń bilek terisi sydyrylǵan.
Aızat 22 maýsymǵa qaraǵan túni Taldyqorǵandaǵy aýrýhanaǵa jetkizilgen. Alaıda dárigerler onyń aýrýhanaǵa jetkenshe kóz jumǵanyn aıtqan. Jaqyndary kúıeýiniń zorlyq-zombylyq izderin jasyrýǵa tyrysqanyn alǵa tartady.
Kýágerlerdiń sózine qaraǵanda, er adam oqıǵa kezinde mas kúıde bolyp, agressıv áreketter jasaǵan. Ol áıeliniń terezeden qulap ketkenin aıtpaq bolǵan. Alaıda marqumnyń týystary bul azaptaý jáne qasaqana kisi óltirý dep sanaıdy.
Qazir bul is QR Qylmystyq kodeksiniń 106-baby, 3-bóligi ("Densaýlyqqa qasaqana aýyr zıan keltirý") boıynsha tergelip jatyr. Marqumnyń jaqyndary bul bapty asa qatygezdikpen jasalǵan adam óltirý retinde qaıta saralaýdy talap etip jatyr.
Polısıanyń málimdemesi
Jetisý oblysy polısıa departamentiniń habarlaýynsha, 22 maýsymda bolǵan áıel ólimine baılanysty sotaldy tergeý jumystary júrip jatyr. Kúdikti oqıǵa bolǵan alǵashqy kúnnen bastap qamaýǵa alynǵan. Qazir birqatar sot-medısınalyq saraptama nátıjesi kútiledi. Osy qorytyndylardyń negizinde prokýratýramen kelise otyryp, kúdiktiniń is-áreketine naqty quqyqtyq baǵa beriledi.
"Áleýmettik jelilerde túrli rastalmaǵan málimetter men boljamdar taralyp jatyr. Qazaqstan zańnamasyna sáıkes, kórineý jalǵan aqparat taratqandar zań aldynda jaýap beredi", – delingen polısıa habarlamasynda.
Quqyq qorǵaý organdary azamattardy tek resmı aqparat kózderine senýge jáne tergeý barysyna yqpal etýi nemese jurtshylyqty shatastyrýy múmkin jalǵan derekterdi jarıalap, taratýdan bas tartýǵa shaqyrdy.
Qazir polısıa bul isti QR QK-nyń 106-baby 3-bóligi boıynsha tergep jatyr. Marqumnyń týystary isti erekshe qatygezdikpen jasalǵan adam óltirý retinde qaıta saralaýdy talap etip otyr.