Premer-Mınıstr Oljas Bektenovtiń tóraǵalyǵymen ótken Úkimet otyrysynda Qazaqstanda atom energetıkasyn damytý perspektıvalary qaraldy, dep habarlaıdy aqshamnews.kz
• Energetıka mınıstri Almasadam Sátqalıev baıandamasynda el ekonomıkasynyń turaqty ósýi elektr energıasyna suranystyń artýymen qatar júretinin atap ótti. Ónerkásip, metalýrgıa, kólik, IT, farmasevtıka, aýyl sharýashylyǵy ónimderin qaıta óńdeý jáne basqa da sektorlarda jańa jobalardy iske asyrý úshin qazirdiń ózinde elektr energıasynyń edáýir kólemi qajet.
«Bul jobalar jańa jumys oryndaryn qurýǵa, ekonomıkalyq ósýdi yntalandyrýǵa jáne azamattardyń ál-aýqatyn arttyrýǵa baǵyttalǵan. Alaıda olardyń damýy eldegi energıa qýatynyń jetispeýshiligimen shektelýde. Eger jańa turaqty energıa kózderin – jańartylatyn, retteýshi jáne bazalyq qýattardy salý boıynsha shuǵyl sharalar qabyldanbasa, jaǵdaı kúrdelene túsýi múmkin», — dep málimdedi Almasadam Sátqalıev.
Búgingi tańda elektr energıasyn óndirýdiń negizgi úlesi óndiristiń 66%-yn qamtamasyz etetin kómir stansalaryna tıesili. JEK sektory ósimdi kórsetýde: nysandar sany 148-ge jetti, óndiris úlesi shamamen 6%.
Energetıka mınıstrliginiń boljamy boıynsha 2035 jylǵa qaraı Qazaqstanda elektr energıasyn tutyný 152,4 mlrd kVt/saǵ deıin ósedi. Bul rette birqatar obektıvti sebepter boıynsha qoldanystaǵy energıa kózderin óndirý 135 mlrd kVt/saǵ-qa deıin tómendeıdi. Taıaýdaǵy 10 jylda Qazaqstanǵa jıyntyq qýaty 26,5 GVt jańa óndirýshi qýattardy engizý qajet.
Osy baǵytta tıisti jumystar júrgizilýde. Jeke ınvestısıalar esebinen jumys istep turǵan elektr stansalaryn jańǵyrtý jáne keńeıtý boıynsha 22 ınvestısıalyq kelisim jasaldy. Ulytaý, Qyzylorda, Túrkistan oblystarynda, Almatyda jalpy qýaty 3500 MVt-tan asatyn manevrli gaz elektr stansalaryn salý boıynsha jobalar portfeli iske asyrylýda. Jańa JEO salý boıynsha sharalar qabyldandy. Sonymen qatar ekonomıka men halyqtyń ósýin eskere otyryp, elektr energıasynyń bolashaq tapshylyǵyn qanaǵattandyrý úshin qolǵa alynatyn sharalar áli de jetkiliksiz. Mınıstrdiń aıtýynsha, álemdik tájirıbe kórsetkendeı, atom elektr stansasyn salý – shyǵatyn qýattardy aýystyrý jáne Qazaqstannyń energıaǵa táýelsizdigin qamtamasyz etý úshin jalǵyz durys sheshim sanalady.