Brıtanıa ımperıasy ordeniniń kavaleri, álemge áıgili bıshi ári horeograf Akram Han Abaı atyndaǵy Qazaq ulttyq opera jáne balet teatrynyń balet trýppasyna birneshe kún boıy sheberlik sabaqtaryn ótkizdi, dep habarlaıdy aqshamnews.kz
18 jasynda óziniń qoıylymdarymen bı álemine jańa serpin bergen sheber, qara shańyraq ártisteriniń sezim tili – bı tilin tereńdetýge yqpal etti.
Abaı atyndaǵy teatrdyń balet trýppasy úshin Akram Hannyń zamanaýı horeografıa stılimen, sezimder men emosıalardy bı arqyly jetkizý ádisterimen tanysý mańyzdy boldy. Eki aptaǵa sozylǵan sheberlik sabaqtar tabysty ótti. Brıtandyq horeograf Abaı teatry ártisteriniń bıge degen kózqarasyn, pedagogtarynyń ashyqtyǵyn erekshe atap ótti.
– Maǵan balet trýppasynyń pedagogtary óte unady. Olar meni jyly qarsy alyp, tánim arqyly suraq qoıýǵa múmkindik berdi. Meniń maqsatym basqa elge kelip, óz erejemdi engizý emes, sol eldiń bıshileri arqyly ózimdi taný. Klasıkalyq balet ártisi bolsa da, onyń denesi men qımyly ulttyq mádenıettiń erekshelikterin kórsetetin tiri qazyna ispetti. Sondyqtan maǵan olardyń bıge degen kózqarasy unady. Men úshin eń mańyzdysy – balet trýppasynyń bıindegi rýhty seziný, – deıdi qoıýshy, bıshi ári horeograf Akram Han.
Akram Han álemdi kóp aralap, jumys istegen ártisterdiń arasynan óz kompanıasyna shaqyratyn talanttardy irikteıdi. Ol Abaı atyndaǵy opera jáne balet teatrynyń keıbir balet ártisterin de joǵary baǵalaǵanyn jasyrmady. Horeograf Qazaqstanǵa alǵash ret kelgenin jáne aldaǵy josparlary ýaqyt óte anyqtalatynyn aıtty.
Túp tamyry musylmannan shyqqan áıgili bıshi úshin Qazaqstannyń qasıetti jeri – Túrkistanǵa, Qoja Ahmet Iassaýı kesenesine barý mańyzdy boldy. Osy oraıda Abaı teatrynyń basshylyǵy oǵan arnaıy sapar uıymdastyrdy.
– Men musylman otbasynda dúnıege kelgendikten, Qazaqstanmen erekshe baılanys sezinemin. Anam rýhanı turǵyda tereń adam edi, sol baılyqty men Qazaqstannan – mádenıetke degen rýhanı kózqarastan taptym. Bıdegi rýhanıatty sózben jetkizý múmkin emes, ol – bı emes. Bı – qozǵalys qana, biraq sol qozǵalysqa deıingi sát, sol úzilis – seniń aıtar sóziń, tiliń. Álemde tildiń kóp túri bar, al bıdiń tilderi odan da mol. Men úshin eń qyzyqtysy – dene tiliniń ózi emes, sol tildiń arasyndaǵy úzilis, qozǵalystar arasyndaǵy tynyshtyq. Sol kezde sen ózińniń qalaı qımyldaǵanyńdy sezinesiń – rýhanı qundylyq degenimiz sol, – deıdi Akram Han.
Álemde tanymal jáne joǵary suranysqa ıe, barlyq óner ordasymen jumys isteı bermeıtin kreatıvti horeograftyń «Arystandar uıyqtap jatqanda» («Until the Lions»), «Kaash», «iTMOi», «DESH», «Tike jol» («Vertical Road»), «Bilim» («Gnosis») jáne «Nól belgisi» («Zero Degrees») sıaqty qoıylymdary bar. Ol Anglıanyń Ulttyq baletimen, Qytaıdyń Ulttyq baletimen, ataqty balerına Sılvı Gıllemmen jáne Djýlet Bınosh, Kaılı Mınoýg sekildi álemdik juldyzdarmen jumys istegen. Akram Hannyń qorjynynda Loýrens Olıve syılyǵy, ISPA, Fred jáne Adel Aster sıaqty kóptegen marapattar bar.