Adam balasynyń ómir súrýi belgili bir zańdylyqqa baǵynatyny sekildi, álemdi meken etken kez kelgen memlekettiń de negizgi zańy bolýy shart. Ol zańnyń barlyq eldegi moıyndalǵan ataýy – Konstıtýsıa. Konstıtýsıa – memlekettiń tólqujaty, Táýelsizdigimizdiń eń basty tiregi, beıbitshilik pen tatýlyqtyń eń basty tetigi. Bıyl azat eldiń aıbary bolǵan Ata Zańymyzǵa – 26 jyl!
Osy oraıda Ata Zańymyz týraly qyzyqty málimetterdi nazarǵa usynyp otyrmyz. Elimizdiń basty zańyn tolyq oqymaǵan bolsańyz, bul sizge taptyrmaıtyn aqparat bolmaq.
- 1995 jyly Konstıtýsıa jobasyn talqylaýǵa úsh mıllıonnan astam Qazaqstan azamaty jumyldyrylǵan.
- QR Konstıtýsıasy qabyldanǵannan keıin nebary úsh-aq ret ózgertýler men tolyqtyrýlar engizildi. Ol – 1998, 2007 jáne 2011 jyldar.
- Táýelsizdiktiń 10 jyldyq, 15 jyldyq, 20 jyldyq mereıtoılary qurmetine arnaıy poshta markalary jaryq kórdi. 2005 jyly 10 jyldyq qurmetine 72 teńgelik nomınaldy marka, 2010 jyly 15 jyldyqqa, 2015 jyly 20 jyl tolýyna oraı poshtalyq marka shyǵaryldy.
- Ata Zań mátininiń oryssha nusqasyna (7168 sóz) qaraǵanda, qazaq tilindegi nusqasynda (8904) sóz kóp. Onyń ishinde «jáne» sózi jıi qaıtalanady eken. Zańda bul sóz 224 ret kezdesedi. Al «Respýblıka» sózi 126 ret (orysshasynda 305), «Qazaqstan» sózi 111 ret, «Parlament» sózi 82 ret, «bap» sózi 100 ret qaıtalanady.
- Konstıtýsıadaǵy eń kóp bap qarastyrylǵan bólim – «Parlament» (61 bap), al eń az bap «Adam jáne azamat» (39 bap) bólimine tıesili.
- Qazaqstannyń alǵashqy Konstıtýsıasy 1926 jyly 18 aqpanda KSRO qurylǵannan keıin jáne RSFSR-diń 1925 jylǵy Konstıtýsıasyn eskere otyryp, Qazaq ASSR Ortalyq Atqarý komıtetiniń qaýlysymen túpkilikti redaksıada qabyldanǵan. Osy Negizgi Zań basqarý nysanyn, memlekettik qurylysty, saıası rejımdi, memlekettik bılik organdarynyń, atqarýshy sheshýshi organdardyń qurylymyn bekitti. Konstıtýsıaǵa sáıkes, Qazaqstan RSFSR quramyndaǵy teń quqyqty respýblıka boldy.
- Konstıtýsıa kúniniń qurmetine 2014 jyly Elordada eń uzyn «Italıa pırogi» pisirildi. Ol jospardaǵydaı 15 metr bolyp shyqpaǵanymen, 5 metrge jetip, rekord ornatty. Bul pırogtan qaladaǵy Konstıtýsıaǵa baılanysty suraqtarǵa jaýap bergen turǵyndar dám tatty.
- Konstıtýsıanyń baspalyq nusqasynyń 30-dan astam túri bar. Onyń eń qarapaıym, jumsaq muqabaly túrin 200–500 teńgege satyp alýǵa bolady. Onyń óte qymbat turatyn túrleri de bar.
Internet arqyly ótkizilgen bássaýdada Konstıtýsıanyń eń qymbat nusqasy 130 myń teńgege satyldy, onda Prezıdenttiń qoltańbasy bolǵan.