Qazaq eli Táýelsizdik alǵan sátten búginge deıingi kezeńde «Adamzattyń bárin súı, baýyrym dep» qazaq danalyǵyn álemdik bıikke kótergen hakim Abaıdyń esimin asqaqtatýda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń eńbegi erekshe orasan.
Shyndyǵynda, Qazaqstan Respýblıkasynyń Tuńǵysh Prezıdenti – Elbasy jeke tulǵa retinde jáne jahandyq saıasat sardarlarynyń biregeıi retinde Abaıdyń baı murasyna qurmetpen qarap, onyń esimin álemge tanytýǵa erekshe kúsh saldy. Elbasy bıik deńgeıli jıyndarda, forýmdarda, quryltaıda, sıezerde, úlken kezdesýlerde sóılegen sózderinde Abaıdyń atyn atap, onyń danalyq sózderin mysalǵa keltirip otyrdy.
Almaty qalasynda 1992 jyldyń 30 qyrkúıeginde ótken Dúnıejúzi qazaqtarynyń İ quryltaıynda sóılegen sózinde Elbasy Nursultan Nazarbaev Abaıdyń atyn úsh ret ataıdy ári álem qazaqtaryna qaratyp aıtqan salıqaly sózin qorytyndylaǵan kezde de Abaıdyń sózin keltirip ótedi: «Bul dúnıede bizdiń bir ǵana Otanymyz bar, ol – Táýelsiz Qazaqstan. Biz týǵan memleketimizdiń táýelsizdigin baıandy etýge, qýatyn arttyrýǵa, onyń ıgiligine, halyqaralyq qoǵamdastyqta abyroıynyń ósýine adal qyzmet etýge paryzdarmyz. Ol úshin árbir azamat elimizdiń tutastyǵyn, jerimizdiń bútindigin, halyqtarymyzdyń jarastyǵyn aman saqtaı bilý qanshalyqty úlken tarıhı jaýapkershilik ekenin jan-tánimen sezinýi kerek. Bul jaýapkershilikti men respýblıka Prezıdenti retinde de, qazaq halqynyń bir perzenti retinde de tolyq sezinemin dep sizderdi sendiremin! Halqymyzda «Bólingendi bóri jeıdi» degen maqal bar. Osy ýaqytqa deıin bólingennen, jiktelip, jiliktengennen kórgen zıannan basqa paıdamyz joq. Biz dúnıe júzi qazaǵyn Almatyǵa ádiletsizdikti de, qasiretti de, qýǵyn-súrgindi de kóp kórgen halyqtyń endi basy qosylsa eken dep jınap otyrmyz. «Birińdi, qazaq, biriń dos, Kórmeseń istiń bári bos», dep Abaı aıtqandaı, basymyzdyń qosylatyn, ulttyq oı-sananyń bıiktep, tutasatyn mezgili jetti. Uly Abaı aıtqan ózge minderimizden de arylatyn, ásirese, ejelden qalmaı, janymyzdy jep kele jatqan kúnshildikti, baqastyqty, jel sózge erýshildikti, enjarlyqty qoıatyn kezimiz jetti. Ózine-ózi syn kózben qaramaıtyn halyq bolashaǵyna kóp úmit arta almaıdy. Biz boıymyzdaǵy ozyǵymyzdan úırenip, tozyǵymyzdan jırene bilsek qana órkenıetti memleket, eńseli el bolamyz».
Elbasy úlken tanymmen Abaıdan mysal keltire otyryp, halqyn eldik jolyna shaqyrǵan. Bul Táýelsizdiktiń tańy endi atqan shaq edi.
Elbasy hakim Abaıdy asqaqtatýyn bir sát tolastatpady. Memleket basshysy Nursultan Nazarbaev 1993 jyly 4 mamyr kúni Abaı atyndaǵy Almaty qalalyq qorynyń saltanatty ashylý rásimine qatysyp, hakim Abaıdyń týǵanyna 150 jyl tolýyna oraı ótetin merekelik is-sharalar úlken mádenı oqıǵa ǵana emes, Qazaqstan egemendiginiń qalyptasýyna, álemdik arenada onyń bedeliniń artýyna járdemdesetinin atap aıtty. N.Nazarbaev Qazaqstannyń IýNESKO-ǵa 1995 jyly dúnıejúzilik Abaı jylyn ótkizý týraly usynys jasaǵanyn jaqsy habar retinde aıta kelip, shetelde basylǵan kitaptaryna qalamaqy retinde alǵan 100 myń dollar mólsherindegi alǵashqy jarnasyn Abaı atyndaǵy qorǵa salyp, osy qarajat Abaı shyǵarmalarynyń aǵylshyn tilindegi aýdarmalaryn daıyndaýǵa baǵyttalatyn bolsyn degen tilek bildirgen.
Tuńǵysh Prezıdent Nursultan Nazarbaev osy jyly qyrkúıek aıynda Almaty qalasynda óz jumysyn bastaǵan İİ Halyqaralyq túrki poezıasynyń festıvaline joldaǵan quttyqtaýynda osy is-sharanyń hakim Abaıǵa arnalyp otyrǵanyn erekshe atap ótedi: «Bul festıváldyń egemendi Qazaqstan úshin mańyzy aıryqsha. Ol alda bolatyn uly aqyn ári shyǵystyń oıshyly Abaıdyń 150 jyldyǵyna arnalǵan. Festıvál qazaq ádebıeti danasynyń shyǵarmalaryn shetel tiline aýdarý jumysyna jańa qarqyn beredi degen úmittemiz. Osy kezdesý baýyrlas halyqtardyń rýhanı birigýiniń jaqsy dástúrin qalpyna keltirýge áserin tıgizedi dep senemin».
Memleket basshysy Nursultan Nazarbaevtyń Táýelsizdiktiń tańy atqan jyldardyń ózinde Abaı shyǵarmalaryn aǵylshyn tiline aýdartý arqyly álemge, sonymen qatar arnaıy festıvál uıymdastyryp, túrki dúnıesine tanytýdy oılastyrǵan tereń maqsatty sheshimtal qareketterinen aıqyn kórinedi.
Abaı Qunanbaıulynyń 150 jyldyǵyna oraı 1995 jyl Abaı jyly bolyp jarıalanǵan.
Tuńǵysh Prezıdent Nursultan Nazarbaev IýNESKO-ǵa Abaıdyń 150 jyldyǵyn álemdik deńgeıde atap ótýge usynys jasady jáne ol usynys jahandyq bedeldi uıymnan qoldaý tapty. Sóıtip, Táýelsiz Qazaq eline hakim Abaıdy álemge tanytýǵa múmkindik týdy.
1995 jyldyń 9 tamyzynda Nursultan Nazarbaev Abaı Qunanbaıulynyń 150 jyldyǵyna arnalǵan májiliske qatysyp, kólemdi baıandama oqydy. Búginde osy oqylǵan baıandama «Abaı týraly sóz» degen atpen abaıtaný ǵylymynyń tarıhyna endi.
Elbasy Nursultan Nazarbaevtyń búginde naqylǵa aınalǵan «Abaı álemi bizdi jeti túnde adastyrmas temirqazyq ispetti» degen tereń oıy osy saltanatty jıyndaǵy baıandamasynda aıtylǵan bolatyn.
Hakim Abaıǵa arnalǵan mereıtoı Shyńǵystaý baýraıynda jalǵasyn tapty. Memleket basshysy Nursultan Nazarbaev 1995 jyldyń 11 tamyz kúni Jıdebaı shatqalyndaǵy Abaı jáne Shákárim keseneleriniń saltanatty ashylý rásiminde sóz sóılep, ózi ashty: «Qymbatty dostar! Biz búgin aqynǵa taǵzym jasap, arýaqqa tabyna keldik. Demek aldyna aıqyn jol siltep, artyna adastyrmas jol tastap ketken rýhanı pirimizdi marapattap, madaqtaý úshin emes, onyń kórsetip ketken ósıetin qaıtkende oıdaǵydaı júzege asyra alatyndyǵymyz jaıynda qabyrǵaly qaýym bolyp aqyldasýǵa keldik. Ádilet bar jerde ǵana teńdik bolatynyn, biraq teńdik degende shúlen úlestirý emes, árkimniń eńbegi men yjdahatyna, bilimi men talantyna laıyq alar yrzyq nesibesi ekenin Abaıdyń óleńderi men qarasózderin baıyptap oqyǵan adam aıqyn ańǵarar. Abaı adamdar men halyqtar arasyndaǵy tatýlyqty dáriptedi. Tek tatýlyq bar jerde ǵana ádilet bolmaqshy. Sondyqtan da Abaı adamzatty ádiletke shaqyryp, óz qandastaryn ózgelermen qatar tura alatyndaı óner-bilimge, eńbeksúıgishtik pen yjdahatqa úndedi».
Memleket basshysy Nursultan Nazarbaev 1996 jyly jyr alyby Jambyldyń týǵanyna 150 jyl tolǵan saltanatty jınalysta sóılegen sózinde Uly dalanyń qos alybyn bóle jarmaı hakim Abaıdy da atap ótedi: «Jákeń syndy alypty tereń uǵyný úshin ótken jyly ǵana 150 jyldyǵy toılanyp ótken halqymyzdyń kemeńger oıshyly Abaı dáýirine taǵy da kóz salyp, tipti odan arǵy zamandardy da zerdeleý qajet. Óıtkeni Abaı jańa qalyp pen sony pishin, jańa mazmun men izdenimpaz, órshil rýhy arqyly qazaq jazba ádebıetiniń negizin qalasa, Jambyl Jabaev sanǵasyrlyq aqpa-tókpe sýyryp salma aqyndyq ónerdiń, jyraýlyq dástúrdiń kóshin ilgeri aparyp, osy zamanǵa jetkizgen jáne nebir tarıhı uly ózgeristerdi sol úrdisten alshaq ketpeı-aq jyrlaı bilgen zańǵar qubylys ekeni málim».
Memleket basshysy Nursultan Nazarbaev Qazaq eli Táýelsizdik alǵan jyldary hakim Abaıdy bir sát nazardan tys qaldyrmaı qurmet kórsetip otyrǵan. 1998 jyly jumys saparymen Shyǵys Qazaqstan oblysynda bolǵanda Jıdebaı qonysyndaǵy Abaı men Shákárim kesenesine arnaıy barǵan edi. «Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıin» óz kózimen taǵy bir kórip, qoldaý jasap, nazarynda ustady.
El Prezıdenti Nursultan Nazarbaev 1999 jyly Qazaqstannyń bıznes-elıtasy ókilderine baspa betinde Úndeýin jarıalady. Osy Úndeýde hakim Abaıdy qurmetpen atap ótken: «Álem jańa myńjyldyq qarsańynda tur. Ǵalamsharymyzdyń barlyq elderi, halyqtary qorytyndylaryn shyǵaryp, keleshekke josparlaryn qurýda. Jańa dáýirdiń qandaı bolary árqaısymyzǵa baılanysty bolmaq. Otandastarymdy shynaıy beıbitsúıgishtigi, qamqorlyǵy, jaqyn adamyna kómekke kelýge daıar turýy basqalardan erekshelendirip turatyny úshin men baqyttymyn. Bizdiń qoǵam uly Abaıdyń adamdar birlikti qasterlep saqtaý jáne ony baǵalaý qajet degen naqylymen ómir súredi», dep, táýelsizdiktiń tiregi birlik ekenin danyshpan Abaıdy mysalǵa keltirip aıtqan bolatyn.
Sondaı-aq 1999 jyldyń 29 qyrkúıeginde Astana qalasynda Qazaqstan, Qyrǵyzstan, Tájikstan jáne Ózbekstan mádenıeti men ǵylymy qaıratkerleriniń halyqaralyq kezdesýinde sóılegen sózinde de hakim Abaıdy qurmetpen ataıdy.
Memlekt basshysy Nursultan Nazarbaev 2002 jyly Úndistan Respýblıkasynda resmı saparmen bolyp, osy eldiń astanasy Delı qalasynda M.Gandı memorıalyna bardy jáne uly Úndi gýmanısin kremasıalaý ornyna gúl shoqtaryn qoıyp, ony eki mınýttyq únsizdikpen eske aldy. Sodan soń N.Á.Nazarbaev Delı qalasynda Abaı atyndaǵy kósheniń ashylý saltanatyna qatysty.
Osy jyly Memleket basshysy Túrkıa Respýblıkasynda resmı saparmen bolǵanda, Ystanbul qalasyndaǵy qazaqtar turatyn Zeıtınbýrný aýdanynda Abaı atyndaǵy qazaq orta mektebin ashý rásimine qatysty.
El basshysy 2003 jyly Máskeý qalasynda Reseıdegi Qazaqstan jylynyń ashylý rásiminde sóılegen sózinde, Mahambet Ótemisovtiń 200 jyldyǵyna oraı Atyraý qalasynda ótkizilgen «Mahambet – qaıtpas qaısarlyq pen erkindiktiń óshpes rýhy» atty ǵylymı-tájirıbelik konferensıasynda sóılegen sózinde hakim Abaıdyń esimin qurmetpen atap ótti.
2006 jyly 4 sáýirde Memleket basshysy RF Prezıdenti V.V.Pýtınmen birge Máskeýdiń Chıstoprýdnyı gúlzarynda ornatylǵan qazaq halqynyń klasık aqyny, hakim Abaıdyń eskertkishin ashý saltanatyna qatysty. Eskertkishtiń ashylýynda N.Á.Nazarbaev pen V.V.Pýtın Reseıde Abaı Qunanbaev jylynyń jáne Qazaqstanda A.S.Pýshkın jylynyń ashylýy týraly resmı túrde jarıalady.
El Prezıdenti N.Á.Nazarbaev 2007 jyly Shyǵys Qazaqstan oblysyna jumys sapary barysynda Semeı qalasynda bolyp, Abaı eskertkishine gúl qoıyp, Nevzorovtar otbasy atyndaǵy Beıneleý óneri mýzeıin aralap kórdi. Mýzeıge qazaqstandyq sheberlerdiń sýretter koleksıasyn tartý etti.
Elbasy 2008 jyly 14 mamyrda Astana qalasynda ótken «Nur Otan» halyqtyq-demokratıalyq partıasy «Jas Otan» jastar qanatynyń İ sezinde sóılegen sózinde hakim Abaıdyń jastyq kezeń týraly aıtqanyn keltirip ótedi: «Jasotandyqtar» – elimizdiń eń beldi saıası partıasy «Nur Otannyń» berik tuǵyry ǵana emes, meniń jas kómekshilerim, seriktesterim. Sondyqtan da búgingi basqosýymyzdy «Qazaqstannyń jas patrıottarynyń sezi» dep ataýymyzǵa ábden bolady. Men qazaqstandyq jastardyń danyshpan Abaı babamyzdyń «Jastyqtyń aty aryndap, tas qıaǵa órlediń» degenindeı, óz bolashaǵyn qurýǵa tastúıin daıyn ekendigin kórip, qýanyp turmyn. Al «bolashaq jastardyń qolynda» ekendigi barshamyzǵa aıan. Demek keń-baıtaq Qazaqstannyń úkilegen úmiti, sendersińder, meniń jas dostarym!».
2008 jyly Elbasy N.Nazarbaev Qaraǵandy oblysyna jumys sapary barysynda hakim Abaı eskertkishiniń ashylý rásimine qatysyp, sóz sóıledi. Sondaı-aq 2009 jyly Astana qalasynda ótken «Nur-Otan» halyqtyq-demokratıalyq partıasynyń kezekten tys Hİİ sezindegi «Qazaqstannyń ındýstrıalyq-tehnologıalyq damýy – bizdiń ortaq bolashaǵymyz úshin» atty sóılegen sózinde «Aqyl, qaırat bárin jeńbek» dep uly Abaı aıtqandaı» dep danalyq sózin keltirip ótedi.
Sondaı-aq 2009 jyly Semeı qalasynda Semeı ıadrolyq polıgonyndaǵy synaqtar toqtalýynyń 20 jyldyǵyna arnalǵan saltanatty jınalysta sóılegen sózinde, 2010 jyly Astana qalasynda Qazaqstan halqy Assambleıasynyń Qazaqstan halqy Assambleıasy: Senim. Dástúr. Ashyqtyq. Tózimdilik» atty HVİ sesıasynda sóılegen sózinde, 2011 jyly Almaty qalasynda «Qazaqstan ǵalymdarynyń forýmynda sóılegen sózinde» hakim Abaıdyń esimin qurmetpen atap ótedi. Osynyń barlyǵy hakim Abaıdyń danalyǵyna Elbasynyń erekshe qurmetin kórsetedi.
El tarıhynda teńdesi joq mádenı is-shara Táýelsizdiktiń 20 jyldyǵyn toılaý boldy. Elbasy N.Á.Nazarbaev «Qazaqstan Respýblıkasy Táýelsizdiginiń 20 jyldyǵyna arnalǵan saltanatty jınalysta sóılegen sózinde de hakim Abaıdyń sózin keltirip ótedi.
Memleket basshysy N.Á.Nazarbaev 2011 jyly Qazaqstan halqy Assambleıasynyń HVİİ sesıasynda sóılegen sózinde hakim Abaıdyń danalyǵyna eki márte toqtalyp ótedi. Alǵashynda qazaqstandyqtardyń memlekettik tildi meńgerý máselesine toqtala kelip, hakim Abaıdyń sózin keltiredi: «Uly Abaı bylaı degen edi: «Basqa halyqtyń tili men mádenıetin bilý adamdy sol halyqpen teń etedi». Bul jerde áńgime tek qazaq tili týraly ǵana emes, jalpy tilder týraly. Tildi bilseń, sol halyqpen teń bolasyń. Qandaı tereń sózder! Iaǵnı bul barlyǵy aralasqan, búkil álem bir-birimen qatynasqa túsken búgingi jahandyq dúnıede qajettilik bolsa, ol biz úshin jáne bizdiń balalarymyz úshin de ashyq».
Elbasy sózin qorytyndylaǵan tusta hakim Abaıdyń danalyǵyna taǵy bir oralady: «Qymbatty dostar! Men uly qazaq oıshyly Abaıdyń sózin taǵy da kóldeneń tartqym keledi. Ol bylaı degen bolatyn: «Tań aldyndaǵy sát bárinen qarańǵy». Biz 90-shy jyldary erlik tanyttyq, biz tarıhtaǵy eń kúshti álemdik ekonomıkalyq daǵdarysqa shydas berdik. Biz ımperıanyń qalaı qırap jatqanyn kórdik. Munyń barlyǵy bizdiń kóz aldymyzda bolyp jatty. Eshteńege qaramastan, Qazaqstan tańsáriden de aman ótti. Bizdiń elimiz ósip keledi jáne óziniń pozısıalaryn nyǵaıta túsýde. Qazaqstandyqtar qıamet-qaıym qıyn mindetterdi sheshý tóńireginde birlesip, tabysqa jetýde. Bizdiń elimiz kúsheıe túsýde, bizdiń barlyǵymyz kúsheıe túsýdemiz. Men Qazaqstan jeri boıymyzǵa sińirgen jasampazdyq qýaty álemdegi eń ozyq, eń toptasqan jáne parasatty qoǵam qurýǵa paıdalanylatynyna senimdimin».
El Prezıdenti N.Á.Nazarbaev 2012 jyly Astana qalasynda 2012 jyldyń 30 mamyrynda ótken Álemdik jáne dástúrli dinder kóshbasshylarynyń İV sezinde sóılegen sózinde hakim Abaıdyń din týraly aıtqan danalyq sózin keltirip ótedi: «Qymbatty dostar, Astanada Álemdik jáne dástúrli dinder kóshbasshylarynyń sezin ótkizý dinder arasyndaǵy bitispes ártúrlilik pen alaýyzdyq týraly tezıstiń bar bolǵany eles qana ekenin bildiredi. Bir-birimen jaýlasatyn dinder emes, adamdar men memleketter. Álemniń uly oıshyldary dindi ónegelilik formýlasy dep ataıdy. Uly Abaıda «Dinge senýshiniń boryshy – jaqsylyq jasaý. Biraq senimsiz jasalǵan jaqsylyq ne turady?» degen sóz bar. Kez kelgen dinniń joǵary maǵynasy adam men adamzatty joǵaltyp alǵan jetilý jolyna qaıtarý bolyp tabylady. Bizdiń joǵary mártebeli forýmnyń basty maqsaty da osyǵan kelip tireledi. Barlyq sezge qatysýshylarǵa jemisti jáne syndarly pikirtalastar tileımin. Bizdiń izgilikti nıetterimizde bizge Jaratýshynyń járdemi tıe bersin!».
Memleket basshysy Nursultan Nazarbaev 2013 jyldyń 14 maýsymynda Ózbekstan Respýblıkasynda resmı saparmen bolyp, osy eldiń astanasy Tashkent qalasynda Prezıdent I.A.Karımovpen kezdesti. Sol kúni Memleket basshysy Ózbekstan Respýblıkasy Prezıdenti I.A.Karımovpen birge Tashkent qalasynda Qazaqstan elshiliginiń jańa ǵımaraty men Abaı Qunanbaev eskertkishiniń saltanatty ashylý rásimine qatysty, sodan soń «Sheıhantahýr» keshenine baryp, sheıh Havendı at-Tahýr men dańqty babamyz Tóle bı kesenelerin aralap kórdi.
2015 jyly 8 sáýirde Memleket basshysy Nursultan Nazarbaev Shyǵys Qazaqstan oblysyna jumys sapary barysynda arnaıy Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıine soqty. Mýzeı-qoryqtyń tynys-tirshiligimen tanysty.
2015 jyly 11 naýryzda Astana qalasynda ótken «Nur Otan» partıasynyń HVİ sezinde «Barshaǵa birdeı osy zamanǵy memleket: Bes ınstıtýttyq reforma» taqyrybynda sóılegen sózinde saılaýdyń mánin tereń túsinbeý jaqsylyqqa aparmaıtynyn taldaý barysynda hakim Abaıdan mysal keltirip ótken: «Saıası mádenıetsiz saılaýdyń saldaryn kóptegen eldiń qazirgi ahýalynan baǵamdaýǵa bolady. Sońǵy jyldary keıbir elderdiń azamattary eńbek etýdi umytty. Narazylyq sherýleri sánge aınaldy. Adamdary mıtıńige shyǵýǵa kúndelikti jumysqa barǵandaı asyǵatyn boldy. Sol úshin olarǵa arandatýshylar jalaqy tóleıtin boldy. Saılaý jurtty biriktiretin emes, baýyrlardy bóletin, aǵaıyndy arazdastyryp, ózara qarý kezendiretin boldy. Kóshedegi qarabaıyr saıasatshyldyq pen tek saılaýdan saılaýǵa deıin ómir súrý aqyldy eldiń joly emes. Elge qyzmet etý úshin emes, mansap úshin bılikke umtylý da abyroı ápermeıdi. Osy oraıda uly Abaıdyń qarasózderin eske túsiremin. Ol Úshinshi qarasózinde bylaı deıdi: «Úsh jylǵa bolys saılanady. Áýelgi jyly «Seni biz saılamadyq pa» dep eldiń buldanǵanymen ótedi. Ekinshi jyly kandıdatpen ańdysyp kúni ótedi. Úshinshi jyly saılaýǵa jaqyndap qalyp, taǵy bolys bolyp qalýǵa bolar ma eken dep kún ótedi. Endi nesi qaldy?». Saılaý – ánsheıin saılaý ótkizý úshin emes, eldi birlikke shaqyryp, jurtty eńbekke uıytý úshin bolsa ǵanıbet. Sondyqtan joǵaryda aıtylyp ketken tól maqsatty oryndap, sodan keıin saıası máselelerge kóshken jón. Bul joldy dúnıejúzilik tájirıbe kórsetip otyr».
Sondaı-aq Elbasy N.Á.Nazarbaev 2015 jyly 11 qyrkúıekte Astana qalasynda ótken Qazaq handyǵynyń 550 jyldyǵyna arnalǵan saltanatty jınalysta sóılegen sózinde qazaq handyǵynyń asqaq rýhyn, birlik bolǵan kezde, bilekke bilekti qosqan kezde talaı jaýdan atamekendi azat etkenin aıta kelip, al aýyzbirlik joǵalǵanda eldikten de aıyrylǵanyn aıtqan sátte hakim Abaıdyń sózin keltirip ótedi: «Danyshpan Abaı aıtqandaı, bas-basyna bı bolǵan óńkeı qıqym» eldiń sıqyn ketirdi. Sol kezde búkil dúnıejúzin jaılaǵan, «bólip al da, bıleı ber» atty otarshyldyqqa negizdelgen surqıa saıasat Qazaq elin birjolata Reseı patshalyǵynyń otaryna aınaldyrdy».
2020 jyly Abaıdyń 175 jyldyǵyn Qazaq eli abyroımen atap ótti. Osy mereıtoı aıasynda Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «Abaı amanaty» atty pálsapalyq máni tereń maqalasy jaryq kórdi.
Elbasy osy maqalasynda bizdiń mýzeı týraly arnaıy jyly lebiz bildirgen: «Abaıdyń ómiri men shyǵarmashylyǵyn tutas qamtıtyn «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeı quryldy. Jıdebaıda úsh júz alpys áýlıeli meken Mańǵystaýdan ákelingen ulýtastardan aqshańqan kúmbezdi Abaı-SHákárim kesenesi turǵyzylyp, onyń ashylý rásiminde bul orynnyń endi ár qazaq úshin rýhanı Mekkege aınalǵanyn atap óttim».
Tamyry tereń, kókjıegi kórkem maqalany biz Abaı mýzeıiniń qýanyshy dep qabyldadyq. Onyń sebebi de joq emes. Bizdiń mýzeıde táýelsizdik kezeńindegi abaıtanýǵa arnalǵan arnaıy ekspozısıa bar. Elbasynyń «Abaı amanaty» maqalasy bizge jol kórsetti, osy baǵytty jarqyrata ashyp berdi. Sondyqtan bıik parasatpen jazylǵan maqala – Abaı mýzeıiniń óz qýanyshy.
Elbasynyń danalyqpen aıtylǵan sózi aqıqatqa aınaldy. Abaı mýzeıi Qazaqstannan, shetelden qonaqtar arnaıy izdep keletin rýhanı Mekkege aınalǵany ras.
Elbasynyń osy maqalasy bizge qýanyshpen qatar, úlken jaýapkershilik júkteıdi. Óıtkeni tereń tanymmen jazylǵan maqalada Abaı mýzeıiniń mazmunyn ashatyn oılar mol. Maqalada aıtylǵan mol málimet mýzeıdiń mazmunyn ashýǵa úlken aqylshy bolary anyq. Biz soǵan qýandyq.
Jalpy, Elbasy Nursultan Nazarbaevtyń táýelsizdik jyldary hakim Abaı esimin asqaqtatýy – bárimizge úlgi, erekshe mádenı-tarıhı qubylys.