Memleket basshysy bıylǵy 1 qyrkúıektegi Qazaqstan halqyna Joldaýynda 2025 jyldy Jumysshy mamandyqtar jyly dep jarıalady.
Dástúr boıynsha ekonomıkanyń kóptegen salalarynda óz otbasylarynda kásibı daǵdylardy urpaqtan-urpaqqa beretin eńbek áýletteri qalyptasýda.
Respýblıkamyzda osyndaı júzdegen áýletter bar, olardyń ishindegi eń irileriniń jalpy eńbek ótili 3,3 myń jyldan asqan, dep habarlaıdy aqshamnews.kz.
3,4,5 jáne odan da kóp býyn boıyna ondaǵan myń eńbek saǵattarynda jınaqtalǵan tájirıbeni otandyq mamandar jınaqtap, óz urpaǵyna amanattaıdy. Qazaqstanda óz ómirin belgili bir kásipke arnaǵan áýletterge erekshe qurmetpen qaraıdy.
Máselen, QR Eńbek jáne halyqty áleýmettik qorǵaý mınıstrligi 2016 jyldan bastap jyl saıyn Eńbek kúnin merekeleýge jáne «Eńbek adamyn» qurmetteýge oraılastyrylǵan «Eńbek joly» respýblıkalyq konkýrsyn ótkizedi, ol nátıjeli eńbekti yntalandyrýǵa, jastar arasynda jumysshy mamandyqtardy keńinen nasıhattaýǵa jáne jumysshy áýletterdiń kópjyldyq dástúrlerin nyǵaıtýǵa baǵyttalǵan.
Ár jyldary baıqaýda túrli salalar men kásiporyndardyń jumyskerleri marapattalady.
Mysaly, 2022 jyly Týkýbaevtar áýleti marapattaldy – olardyń jalpy eńbek ótili 600 jylǵa jýyq. Áýlettiń negizin qalaýshylar ótken ǵasyrdyń 30-jyldarynda temirjol salasynda eńbek ete bastaǵan, olar Túrkistan-Sibir magıstraliniń qurylysyna qatysqan.
Ótken jyly taǵy bir «temirjolshylar» áýleti – Amangeldınder otbasy atap ótildi. 4 urpaq temirjolda jarty myń jyldan astam jumys tájirıbesin jınaqtap, birneshe ret túrli keńestik jáne qazaqstandyq nagradalardyń, ordender men medaldardyń ıegerleri atandy.
Taǵy bir erekshe mysal – Qurmanǵalıevter otbasy. Olardyń eńbek áýleti marapattaý kezinde orman sharýashylyǵy salasynda 458 jylǵa jýyq eńbek ótilin «jınaǵany» jáne tórt býynda 25 ókilden turatyny aıtyldy.
Sondaı-aq, «Ekibastuz GRES-2 stansıasy» AQ-da eńbek ete otyryp, Pavlodar oblysynda elektr energıasyn óndirýdiń turaqtylyǵyn qamtamasyz etýge 3 urpaq boıy atsalysyp kele jatqan Seıtjanovtar áýletin atap ótýge bolady. Olardyń jıyntyq eńbek ótili 200 jylǵa jýyqtady.