2023 jyldyń qorytyndysy boıynsha álemdik jel energetıkasynyń qýaty 1 TVt-tan asyp, ótken jylmen salystyrǵanda 12,9%-ǵa artty. Qytaı bul salada kósh bastap, jel energetıkasynyń qýaty 441,9 GVt-qa jetkizdi. Ekinshi orynda turǵan AQSH-tyń (148 GVt) kórsetkishinen úsh ese kóp. Sonymen qatar, Germanıa (69,5 GVt) jáne Úndistan (44,7 GVt) da aıtarlyqtaı nátıjelerge qol jetkizdi, dep habarlaıdy aqshamnews.kz.
Sondaı-aq, 2023 jyly kún energetıkasynyń jahandyq qýaty 32,2%-ǵa artyp, 1,4 TVt-qa jetti. Bul jaǵynan da Qytaı alda tur. Onyń kún energetıkasynyń qýaty 609,9 GVt-qa jetip, AQSH-tyń (139,2 GVt) kórsetkishinen 4,4 ese artyq. Kún energetıkasynda Japonıa (87,1 GVt), Germanıa (81,7 GVt) jáne Úndistan (73,1 GVt) da mańyzdy ról atqardy.
Jel jáne kún energetıkasynyń qýatynyń aıtarlyqtaı ósýine qaramastan, olardyń energıa óndirý kólemi álemdegi elektr energıasyna degen suranystyń artýyna sáıkes kelmeı otyr. 2023 jyldyń qorytyndysy boıynsha álemde óndirilgen elektr energıasynyń jalpy kólemi 29,9 PVt⋅saǵ (petavatt-saǵat) qurap, 2,5%-ǵa ósti. Jel energetıkasy 10,3%-ǵa artyp, 2,3 PVt⋅saǵ-qa jetse, kún energetıkasy 24,2%-ǵa ósip, 1,6 PVt⋅saǵ óndirdi. Jel energetıkasynyń álemdik elektr energıasyn óndirýdegi úlesi 7,8%, al kún energetıkasynyń úlesi 5,5% boldy.
Sońǵy 10 jylda álemdik elektr energıasy óndirisi 6,5 PVt⋅saǵ-qa artty, alaıda jel energetıkasy nebári 1,7 PVt⋅saǵ, al kún energetıkasy 1,5 PVt⋅saǵ qosqan. Negizgi ósim qazba otyn esebinen bolyp otyr, bul dekarbonızasıaǵa kedergi keltiredi.
2023 jyly Qazaqstanda jel jáne kún energetıkasy jalpy elektr energıasyn óndirýdiń 5%-yn qurady (2022 jyly 3,6% bolǵan). Degenmen, Qazaqstan álemdik kórsetkishterden áli de aıtarlyqtaı artta qalyp otyr. Mysaly, Germanıada jel energetıkasy jalpy energıanyń 27,7%-yn, al kún energetıkasy 11,9%-yn qamtamasyz etedi. AQSH pen Qytaıda jel energetıkasynyń úlesi sáıkesinshe 9,6% jáne 9,4%, al kún energetıkasynyń úlesi 5,4% jáne 6,2%-dy quraıdy.