Keshe, 1 maýsym kúni Pedıatrıa jáne balalar hırýrgıasy ǵylymı ortalyǵynda Balalardy qorǵaý kúnine oraı Ashyq esik kúni ótti.
Bul kúni ata-analar Pedıatrıa jáne balalar hırýrgıasy ǵylymı ortalyǵynyń jetekshi mamandaryna balalaryn tegin qaratyp, keńes ala aldy.
Ashyq esik kúni barlyǵy 100-ga jýyq balaǵa tegin konsýltasıalar júrgizildi. Pedıatrıa ortalyǵynyń balalar pedıatrlary — pýlmonolog, gastroenterolog, kardıolog, revmatolog, ýrolog, hırýrg, kardıohırýrg, nevropatolog, qan tamyrlary hırýrgy, endokrınolog mamandary balalardyń densaýlyǵyn tekserip, syrqaýdy emdeý boıynsha ata-analarǵa qajetti aqparattardy berdi. Sonymen qatar, bul kúnge kelgen ata-analar júrektiń jáne ish qýysy músheleriniń jáne búırektiń últradybystyq zertteýinen tegin ótýge múmkindik aldy.
Ortalyq mamandary shara aıasynda ata-analarmen bala emizý, durys tamaqtaný, ımmýnoprofılaktıka, jeke bas gıgıenasy, gadjetterdiń ósip kele jatqan aǵzaǵa tıgizetin zıany týraly áńgimeler júrgizdi.
«Pedıatrıa ortalyǵy janyndaǵy aqyly dıagnostıkalyq bólimge kelýshiler sany basqa kúnderi de kóp. Bul aksıa kelýshiler úshin naǵyz tosyn syı boldy. Ata-analary tegin qarap jatqanyn bilip, qatty qýanyp jatyr. Búgin kelgen ata-analar barlyq qabyldaýlar men ýzılerden tegin ótkenderi úshin dán rızashylyqtaryn bildirýde. Balalar úshin de tosyn syılar ázirlenip, ádemi tústi sharlar men syılyqtar syıǵa tartyldy», - deıdi Aqyly dıagnostıkalyq keńes berý bóliminiń meńgerýshisi Alfıa Nazarova.