«Qazaqstandyq atom elektr stansıalary» JSHS Atom energetıkasy bóliminiń jetekshi ınjeneri Asýan Sıabekov Astana qalasynyń kásipodaq qyzmetkerlerimen kezdesý ótkizdi. Kezdesý barysynda A. Sıabekov elimizdiń energojúıesiniń qazirgi jaǵdaıy men AES salýdyń qajettiligi týraly egjeı-tegjeıli baıandap, elektr energıasyna degen suranystyń artýy men eskirgen ınfraqurylymnyń máselelerin atap ótti. Onyń aıtýynsha, Qazaqstandaǵy jylý elektr stansıalarynyń 70-80%-y tozǵan, al keıbir qalalarda bul kórsetkish 90%-ǵa deıin jetip otyr. Mundaı jaǵdaı elektr qýatyn óndirýde turaqtylyqtyń tómendeýine, úzilister men apattyq jaǵdaılardyń kóbeıýine ákelýi múmkin.
– Ekibastuz jáne Rıdder qalalaryndaǵy qazandyqtardaǵy aqaýlar bul máseleniń aıqyn dáleli bolyp otyr. Jylý elektr stansıalarynyń tozý deńgeıi men tutynýshylar sanynyń artýyna baılanysty, elimizge jańa energıa kózderin shuǵyl túrde engizý qajet, – dep atap ótti Asýan Sıabekov.
Sonymen qatar, ol atom energetıkasy jańartylatyn energıa kózderimen salystyrǵanda turaqty ári senimdi ekenin aıtty. Kún men jel energıasy aýa raıyna táýeldi bolsa, AES úzdiksiz jumys istep, qajetti energıa kólemin turaqty túrde óndire alady.
– AES salý tek energetıkalyq qaýipsizdikti qamtamasyz etip qana qoımaı, ekologıany jaqsartýǵa da aıtarlyqtaı úles qosady. Atom energıasy kómir men gaz sıaqty dástúrli kózderge qaraǵanda áldeqaıda taza ári tıimdi. Bul Qazaqstannyń "jasyl" ekonomıkaǵa kóshýine yqpal etedi, – dedi Asýan Sıabekov.
Sıabekov sondaı-aq, Qazaqstannyń ýran qorynyń moldyǵy AES salýdyń ekonomıkalyq turǵydan tıimdiligin arttyratynyn atap ótti. Ýrannyń Qazaqstandaǵy mol qory eldiń energıa salasyn damytyp qana qoımaı, energetıkalyq táýelsizdikti qamtamasyz etýge múmkindik beredi.
– Qazaqstan álemdegi ýran óndirisi boıynsha kósh bastap keledi, jáne bizde AES úshin qajetti shıkizat ta bar. Ony tıimdi paıdalanyp, elimizdiń energetıkalyq áleýetin tolyq iske asyrýymyz kerek, – dep túıindedi ol.