Qazaqstanda dzúdodan álemdik bedeldi jarystardyń biri – «Qazaqstan barysy Grand Slam» týrnıri ótedi, dep habarlaıdy Almaty-akshamy.kz.
Týrnır elordada 16–18 maýsym aralyǵynda «Barys Arena» sport kesheninde uıymdastyrylady.
Halyqaralyq dzúdo federasıasynyń kúntizbesine «Qazaqstan barysy Grand Slam» ataýymen engizilgen bul jarysqa barlyǵy 400-den astam sportshy qatysady dep josparlanǵan. Qatysýshylardyń qatarynda Olımpıada oıyndary, álem jáne Azıa chempıonattarynyń jeńimpazdary men júldegerleri de bar.
Bul álemdik doda barlyq dzúdoshylar úshin 2024 jyly Parıjde ótetin jazǵy Olımpıada oıyndaryna joldama alýǵa jaqsy múmkindik. Sonymen qatar, «Qazaqstan barysy Grand Slam» týrnıri aıaqtalǵannan keıin elimizde dzúdodan halyqaralyq oqý-jattyǵý lageri turaqty negizde ótkiziletin bolady.
Dzúdodan Qazaqstan quramasy IJF Grand Slam jarystarynda osy ýaqytqa deıin 7 altyn, 14 kúmis jáne 36 qola medal enshilegen. Qazir respýblıka boıynsha dzúdoshylar sany 90 myńǵa jetti. Bapkerler sany – 1304 adam.
Esterińizge sala ketsek, 2023 jyldyń aqpan aıynda Qazaqstan dzúdo federasıasy elimizde Grand Slam álemdik týrnırin ótkizý úshin Halyqaralyq dzúdo federasıasymen (IJF) tórt jyldyq kelisimshartqa qol qoıdy.
Grand Slam (Úlken dýlyǵa) – halyqaralyq jarys kúntizbesi boıynsha IJF World Tour aıasynda ótkiziletin álemdik jarystar serıasy. IJF erejeleri boıynsha jarystyń jeńimpazdary men júldegerleri arasynda álemdik jáne olımpıadalyq reıtıńterde upaılar bólinedi. Atap aıtqanda, 1 oryn úshin 1000 upaı, 2 oryn úshin – 700 upaı, 3 oryn úshin – 500 upaı esepteledi.