Bıyl elimizdiń mektepterindegi sońǵy qońyraý Balalardy qorǵaý kúnimen tuspa tus keldi.
Bul qos mereke Almaty qalasyndaǵy balalar kolonıasyndaǵy sottalǵan balalar úshin tipten erekshe mereke boldy.
Almaty qalasy QAJD №11 mekemesiniń basshylyǵy Balalar kúni men sońǵy qońyraý merekesinde jazaly jasóspirimder úshin «Ashyq esik kúnin» uıymdastyryp, balalar saǵynyp júrgen ata-analarymen, týystarymen júzdesti.
Saltanatty merekeni mekeme bastyǵynyń mindetin atqarýshy ádilet maıory D.Mashımbaev ashty. Ol bıyl orta mektepti bitiretin túlekterge aq jol tilep, oqýshylardyń esinde máńgi qalatyn aıtýly kúni balalarymen júzdesýge kelgen ata-analary men týystaryna alǵysyn bildirdi.
Oınaqtap júrip ot basqan balalardyń búgingi janashyry da, ata-anasynyń ornyndaǵy qamqorshylary da – mekeme qyzmetkerleri men muǵalimderi. Osyǵan oraı balalarǵa jyl boıy sapaly bilim bergen ustazdar da marapattalyp, Almaty qalasy boıynsha QAJD bastyǵy ádilet polkovnıgi A.Qaıyrbekovtyń Alǵys hatyna ıe boldy.
Sońǵy qońyraý saltanatynda mektep dırektorynyń orynbasary Lúdmıla Almazova oqýshylardy quttyqtap, olardyń tezirek jazalaryn ótep, týǵan úılerine oralýlaryna tilektestigin bildirdi. Respýblıkadaǵy qylmys jasaǵan balalar jazasyn óteıtin jalǵyz kolonıada qazirgi tańda 36 bala ustalýda. Onyń ishinde 27 bala asa aýyr qylmys, 9 bala aýyr qylmys jasaǵany úshin sottalǵan.
Balalar kolonıasyndaǵy «Ashyq esik kúninde» barlyǵy 21 ata-ana men týysqandary kelip, sottalǵan balalardyń qýanyshyn eseleı tústi.