Astanada Qazaqstan kınologtar odaǵy uıymdastyrýymen ıtter kórmesi ótti.
Onyń aıasynda arnaıy halyqaralyq komısıa qazaq tazy tuqymynyń 100-ge jýyq túrin zerttedi, dep habarlaıdy Almaty-akshamy.kz Ekologıa jáne tabıǵı resýrstar mınıstrligine silteme jasap.
İs-sharaǵa qatysýshylar aldynda QR Ekologıa jáne tabıǵı resýrstar mınıstri Erlan Nysanbaev quttyqtaý sóz sóıledi.
Óz sózinde: «Tazy – qazaqtyń alǵashqy ıt tuqymy, qazaq halqynyń maqtanyshy, Jeti qazynanyń biri. Qazir qoǵam men memlekettiń bizdiń tuqymdardy saqtaý jáne molaıtý jónindegi kúsh-jigerin shoǵyrlandyrý, olardyń gendik qoryn degradasıa men metızasıadan qorǵaý jáne qoldaý boıynsha sharalar qabyldanýda. Qazaqtyń ıt tuqymdaryn saqtaý jáne ósimin molaıtý máseleleri zańnamalyq deńgeıde bekitildi, Memleket basshysy Qazaqstan Respýblıkasynyń tıisti Zańyna qol qoıdy» dep atap ótti.
Zertteý qorytyndysy boıynsha komısıa kórmede halyqaralyq kınologıalyq federasıanyń (FCI) bas komıtetiniń qazaq tazysyn halyqaralyq taný jáne «Kazakh Tazy» brendin Qazaqstanǵa bekitý týraly jumystar jasalyp josparǵa alynatyny bolady.
Qazaqstan Kınologtar odaǵynyń prezıdenti Baýyrjan Serikqalı bul kórme ıtterdiń sulýlyǵyn kórsetý ǵana emes ekenin atap ótti. Bul qazaq halqy úshin tarıhı mańyzy bar is-shara, elimizdiń ulttyq maqtanyshy men mádenı murasynyń nyshany-qazaq tazy tuqymyn ulttyq qazyna jáne brend retinde bekitý jáne halyqaralyq taný múmkindigi bolyp tabylady.
Qazaqtyń ıt tuqymdaryn halyqaralyq deńgeıde taný úshin FCI mindetti talaptarynyń biri ıtterdi zertteý, olardyń shyqqan elindegi tuqymnyń jaı-kúıi men damý perspektıvalaryn zertteý bolyp tabylady.
Kórmege qatysý úshin Qazaqstan kınologtar odaǵy ártúrli jas sanattary men tústerindegi 100 ıtti muqıat iriktep aldy.