2022 jyly 218 213 onkologıalyq pasıent dınamıkalyq baqylaýda bolsa, byltyrǵy sany 5,7%-ke artqan. Onyń 56%-ten astamy – áıel.
Al qaterli isiktiń taralýy boıynsha birinshi orynda sút bezi obyry tur. 28 mamyr – Halyqaralyq áıelder densaýlyǵyn qorǵaý kúni, dep habarlaıdy Almaty-akshamy.kz.
Elde áıelder arasynda qaterli isikke shaldyqqandar sany órship tur. Birinshi orynda sút bezi qaterli isigi bolsa, odan keıin jatyr moıyny men analyq bez obyry tur. Dertke shaldyqqandardyń deni 40 pen 50 jas arasynda. Mamandardyń aıtýynsha, der kezinde skrınıngten ótý – qaterli isiktiń aldyn alýǵa kómek.
Merýert Jumajanova, medısınalyq-genetıkalyq konsýltasıalar bóliminiń meńgerýshisi: - Skrınıngten ótý tásilderi nemese jalpy aǵzany tolyqtaı tekseristen ótkizý bul ár adam úshin mańyzdy. Mamandar osy tekseris arqyly qandaı da bir aýytqý bolmasa, qaýip baryn anyqtap, arnaıy em-dom jasaıdy. Bul – qaterli aýrýlardyń erte kezeńde anyqtaýǵa kómek.
2023 jyly dınamıkalyq baqylaýǵa 218 213 onkologıalyq pasıent tirkelgen. Bul 2022 jylǵa qaraǵanda 5,7%-ke ósken. Onyń ishinde 43,7%-i erler bolsa, 56,9%-i – áıelder. Byltyr 41 515 naýqastan qaterli isik anyqtalsa, onyń 12 myńnan astamy kóz jumǵan. Naýqastardyń 55,6%-i – 18 ben 64 jas aralyǵyndaǵy eńbekke qabiletti adamdar. Al sút bezi obyryna shaldyqqandardyń eń jasy 23 jasta.
Nurshaı Ázimbaeva, QR DSM Sanıtarıalyq-epıdemıologıalyq baqylaý komıtetiniń basqarma basshysy: - Qazirgi kezde adam papıllomasy vırýsyna qarsy vaksıansıany engizý jóninde jumys bastalyp jatyr. Osy Qazaqstan Respýblıkasynda. Munyń ózektiligi – jatyr moıyny obyry, ıaǵnı bul onkologıalyq aýrýdyń bizdiń elde óte joǵary kórsetkishte tirkelýi. Nege? Óıtkeni jyl saıyn 1900-den astam adam áıelder osy aýrýǵa shaldyǵady. Ol – óte úlken kórsetkish.
Jyl saıyn álemde jatyr moıny obyrynan 300 myńǵa jýyq áıel kóz jumady. Al respýblıka boıynsha 2000-ǵa jýyq jańa jaǵdaı tirkeledi, 600-den astam áıel osy patologıadan qaıtys bolady. Jaqynda Úkimet adam papıllomasy vırýsyna qarsy vaksına satyp alýǵa jáne Qazaqstanda ekpe jumysyn júrgizýge 9,7 mlrd teńgeden astam qarjy bóldi. Aldaǵy ýaqytta 11 jastaǵy 175 myńǵa jýyq qyz balany vaksınamen qamtý kózdelgen.