Búgin Týrızm jáne sport mınıstrligi janynan Kanvon-2024 qysqy jasóspirimder Olımpıadasy men Parıj-2024 jazǵy Olımpıada jáne Paralımpıada oıyndaryna daıyndyq boıynsha shtabtyń ashylýy ótti.
2023 jylǵy 13 jeltoqsanda sport sarapshylarynyń qatysýymen jasóspirimder Olımpıadasy men Olımpıadalyq jáne Paralımpıadalyq oıyndaryna Ulttyq qurama komandalarynyń jumysyn uıymdastyrý boıynsha shtab qurý týraly mınıstrliktiń buıryǵy qabyldanǵan bolatyn, dep habarlaıdy almaty-akshamy.kz.
Atalǵan shtab Memleket basshysynyń Týrızm jáne sport mınıstrligi, Ulttyq Olımpıada komıteti jáne sport federasıalary birlese jumys isteý kerek degen tapsyrmasyn oryndaý maqsatynda quryldy. Shtabtyń negizgi jumysy – sportshylardyń aldaǵy jarystarǵa sapaly daıyndyǵyn qamtamasyz etý. Shtab barlyq keshendi jarystar aıaqtalǵanǵa deıin turaqty negizde jumys isteıtin bolady.
Shtabtyń quramyna 6 adam kirdi:
1. Qanaǵatov E.B. - QR UOK sport departamentiniń dırektory;
2. Sápıev S.J. – QR UOK Bas hatshysynyń orynbasary;
3. Ahmetshárip D.S. – qoǵam jáne buqaralyq aqparat quraldarymen baılanys jóninde mınıstr keńesshisi;
4. Nursafına A.T. – Qazaqstan Respýblıkasy Týrızm jáne sport mınıstrligi Sport jáne dene shynyqtyrý isteri komıtetiniń «Sportty damytý dıreksıasy» RMQK kórkem gımnastıkadan komanda basshysy;
5. Aldonǵarov N.J. – Qazaqstan Respýblıkasy Týrızm jáne sport mınıstrligi Sport jáne dene shynyqtyrý isteri komıtetiniń «Sportty damytý dıreksıasy» RMQK sporttyq órmeleýden komanda basshysy;
6. Qıatbaı B.B. – «Ulttyq kónkıshiler federasıasy» Respýblıkalyq qoǵamdyq birlestiginiń sporttyq dırektory.
İs-sharaǵa Olımpıada jeńimpazdary men júldegerleri jáne bıylǵy álem birinshilikteri men halyqaralyq jarystardyń jeńimpazy men júldegeri, sport jýrnalıseri qatysty. Jıynda sóz alǵan Týrızm jáne sport mınıstri Ermek Marjyqpaev 2023 jyl el sporty úshin sátti jyl bolǵanyn, jerlesterimiz halyqaralyq arenalarda jarqyn jeńisterge qol jetkizgenine erekshe toqtalyp, keler jyly ótetin baıraqty básekelerge daıyndyq barysyn baıandady. Máselen, bıyl elimizde ótetin 5-shi Dúnıejúzilik kóshpendiler oıyndaryna aýqymdy daıyndyq ótken jyly bastaldy. Memleket basyshysy birer kún buryn «Egemen Qazaqstan» gazetine bergen suhbatynda «Dúnıejúzilik kóshpendiler oıynyn ótkizý de elimiz úshin aıtýly oqıǵa bolmaq. Baıraqty báseke ulttyq sport pen salamatty ómir saltyn dáripteý jaǵynan da, Uly daladaǵy kóshpendiler órkenıetiniń murageri sanalatyn baýyrlas halyqtardyń mádenı-gýmanıtarlyq baılanysyn arttyrý turǵysynan da mańyzdy ekeni sózsiz», dep atap ótken edi.
«Búgin biz Memleket basshysynyń Kanvon-2024 qysqy Jasóspirimder Olımpıadasyna, Parıjdegi jazǵy Olımpıada jáne Paralımpıadasyna daıyndyq jónindegi tapsyrmasyn oryndaý maqsatynda qurylǵan shtabtyń birinshi otyrysyna jınaldyq. Ulttyq quramanyń sapaly daıyndyǵy úshin sportshylar pýly, ıaǵnı lısenzıa men medal jeńip alýy múmkin úmitkerler jasaqtaldy. Quramanyń keıbir kóshbasshylary Olımpıadaǵa jeke jospar boıynsha daıyndalady. Iaǵnı, ár sport túriniń ereksheligin, sportshynyń qajettiligin, fızıoterapıany, jaraqattardy ońaltý men aldyn alýdy, psıhologıalyq qoldaýdy jáne sportshylardy jarysqa daıyndalýda stressti basqarýǵa kómektesýdi qosa alǵanda, medısınalyq-bıologıalyq qamtamasyz etýdi eskere otyryp jasalady. Aıta ketý kerek, sportshylardy daıarlaý kúntizbesin qalyptastyrý tásilderi men qaǵıdattary tolyǵymen qaıta qaraldy», - dedi Ermek Marjyqpaev.
Esterińizge sala keteıik, IV qysqy jasóspirimder Olımpıadasy 2024 jyldyń 19 qańtary men 1 aqpany aralyǵynda Ońtústik Koreıanyń Kanvon qalasynda ótedi. Al Fransıanyń Parıj qalasynda XXXIII jazǵy Olımpıada oıyndary 2024 jyldyń 26 shildesi men 11 tamyzy aralyǵynda ótse, HVİİ Jazǵy Paralımpıada oıyndary 2024 jyly 28 tamyz 8 qyrkúıektiń aralyǵynda ótedi.