Astananyń polıseıleri qalada iri kólemde esirtki satýmen aınalysqan topty ustady, dep habarlaıdy almaty-akshamy.kz Polisia.kz silteme jasap.
Polıseıler «Qarasora – 2023» jedel-profılaktıkalyq is-sharasy kezinde iri kólemde esirtki zattaryn zańsyz satýmen aınalysqan 38, 33 jáne 30 jastaǵy Jambyl oblysynyń úsh turǵynyn qolǵa túsirdi. Esirtki qylmysyna qarsy kúres basqarmasynyń qyzmetkerleri esirtki satýshylar toby turǵan páterdi tintip, esirtki ósimdik tektes sur-jasyl zaty bar lentaǵa oralǵan polıetılen paketterin tapqan.
Sarapshynyń qorytyndysyna sáıkes, tárkilengen zattar jalpy salmaǵy 5 keli, 150 gram bolatyn gashısh ekeni rastaldy. Tergeý kezinde ustalǵandar kinásin moıyndap, Astana qalalyq PD ýaqytsha ustaý ızolátoryna qamaldy.
Esirtki satýshylardyń biri osyǵan uqsas qylmysty jasaǵany úshin buryn da birneshe ret sottalǵany belgili boldy. Qazir atalǵan fakti boıynsha QR Qylmystyq kodeksiniń 297-baby 2-bóligi boıynsha sotqa deıingi tergeý amaldary júrgizilip jatyr.
Tártip saqshylary eger adam asa iri mólsherde esirtki men psıhotroptyq zattardy, soǵan uqsas basqa da zattardy satýmen, zańsyz óndirý, qaıta óńdeý, ıemdenip, saqtaýmen aınalyssa 6 jyldan 12 jylǵa sottalýy múmkin ekenin eske salady.