Elimizde qazan aıynyń sońǵy jeksenbisinde Áleýmettik qorǵaý júıesi qyzmetkerleriniń kúni atap ótiledi.
Búginde respýblıkada áleýmettik qorǵaý salasynda 35 myńnan astam adam eńbek etedi. Áleýmettik kodeks aıasynda áleýmettik qyzmetkerlerdiń mártebesi ósedi. Osy maqsatta olardy oqytý jáne olarǵa sanattar bere otyryp, odan ári sertıfıkattaý kózdelgen. Al 2025 jyldan bastap áleýmettik qyzmetkerlerge eńbekaqy tóleýdiń jańa júıesi engiziledi, dep habarlaıdy almaty-akshamy.kz
Halyqty áleýmettik qorǵaý salasynda jumys isteıtin 35 myń mamannyń ishinde medısına qyzmetkerleri, arnaıy pedagogtar men áleýmettik qyzmetkerler arnaýly áleýmettik qyzmetter kórsetedi. Respýblıka boıynsha áleýmettik qyzmetkerler sany 12704 adamdy quraıdy, onyń 1251-i úkimettik emes sektorda jumys isteıdi.
AÁQ-nyń negizgi maqsaty – azamattarǵa týyndaǵan áleýmettik máselelerdi eńserýge kómek kórsetý jáne qoǵam ómirine qatysý múmkindikterin qalyptastyrý. Qajettilikke baılanysty arnaýly áleýmettik qyzmetter 8 baǵyt boıynsha usynylady: áleýmettik-turmystyq, áleýmettik-medısınalyq, áleýmettik-psıhologıalyq, áleýmettik-pedagogıkalyq, áleýmettik-eńbek, áleýmettik-mádenı, áleýmettik-ekonomıkalyq, áleýmettik-quqyqtyq.
AÁQ-ny 740-qa jýyq memlekettik uıym usynady, onyń ishinde: 118 memlekettik arnaýly áleýmettik qyzmet kórsetý ortalyqtary, 87 memlekettik kúndizgi bolý ortalyqtary, 34 memlekettik ońaltý ortalyqtary, 505 úıde áleýmettik kómek kórsetý bólimsheleri.
Búgingi kúnde AÁQ kórsetý boıynsha áleýmettik tapsyrysty elimizdiń barlyq óńirlerinde 189 ÚEU júzege asyrýda.
Áleýmettik kodeksti iske asyrý aıasynda QR Eńbek jáne halyqty áleýmettik qorǵaý mınıstrligi arnaýly áleýmettik qyzmetter kórsetý júıesin jańǵyrtý boıynsha kelesi baǵyttar boıynsha jumys júrgizýde: AÁQ jáne tarıf belgileý standarttaryn jetildirý; arnaýly áleýmettik qyzmetter júıesin monopolıasyzdandyrý jáne deınstýalızasıalaý; áleýmettik qyzmetkerlerdiń mártebesin kóterý.
Áleýmettik kodekste áleýmettik qyzmetkerlerge jeke taraý arnalǵanyn atap ótken jón, onda olardyń kásibı qyzmetin júzege asyrý kezindegi quqyqtary men mindetteri, jumystyń mártebesi men erekshelikteri, kásibı qupıa men minez-qulyq etıkasy týraly uǵymdar, kásibı qyzmetti oryndaýǵa baılanysty shekteýler jáne áleýmettik kepildikter kórsetilgen.
Áleýmettik kodeksti iske asyrý aıasynda áleýmettik qyzmetkerlerdiń biliktiligin arttyrý kózdeledi. Oqý aıaqtalǵannan keıin kásiptik daǵdylarǵa sáıkes sanattar berile otyryp sertıfıkattalady. Sondaı-aq Áleýmettik qyzmetkerler tizilimin qurý kózdelgen, bul múgedektigi bar adamdardyń ózderine qajetti mamandy tańdaýǵa múmkindik beredi. 2025 jyldan bastap áleýmettik qyzmetkerlerdiń kásibı deńgeıi men oryndalatyn jumystardyń kúrdeliligin eskere otyryp, olarǵa eńbekaqy tóleýdiń jańa júıesi engiziletin bolady.
2021-2023 jyldar aralyǵynda áleýmettik sala qyzmetkerleriniń jalaqysy kezeń-kezeńimen arttyrylǵanyn esterińizge salamyz. Nátıjesinde ár qyzmetkerdiń jalaqysy 2 ese ósti.
Sonymen qatar, qoldanystaǵy qosymsha aqynyń mólsherin bazalyq laýazymdyq jalaqynyń 30 paıyzynan laýazymdyq jalaqynyń 40 paıyzyna ózgertý jolymen – ákimshilik, kómekshi personal qyzmetkerleriniń, memlekettik uıymdarda jumys isteıtin, onyń ishinde: stasıonarlyq jáne jartylaı stasıonarlyq úlgidegi medısınalyq-áleýmettik mekemelerde, úıde qyzmet kórsetý, ýaqytsha bolý uıymdarynda jumys isteıtin jumyskerlerdiń jalaqysy artty.