Astana ákimi Jeńis Qasymbek Instagram-daǵy paraqshasynda qalany jylýmen jáne sýmen qamtamasyz etetin ınfraqurylym nysandarynyń jumysy týraly jazdy, dep habarlaıdy almaty-akshamy.kz
"Qalany jylýmen jáne sýmen qamtamasyz etetin ınfraqurylym nysandarynyń jumys barysymen tanystym. Olar – JEO-3, JEO-2, aýyz sý stansıasy (SSS-3), "Turan" jáne "Ońtústik-SHyǵys" gaz jylý stansıalary. Ózderińiz biletindeı, ótken jyldyń kúzinde biz "Ońtústik-SHyǵys" gaz jylý stansıasynyń, "Turan" gaz jylý stansıasynyń birinshi kezeńiniń, qurylysy uzaqqa sozylǵan JEO-3 nysanyn aıaqtadyq. Bul nysandar qalaǵa 1100 saǵ/Gkal-dan astam jylý beredi. Osylaısha bizge jylytý maýsymynda profısıtke shyǵýǵa múmkindik beredi. Sonymen qatar, ótken jyldyń jazynda Astana sý qoımasynan tartylatyn sý qubyry jáne úshinshi aýyz sý stansıasy salyndy", - dep jazdy Qasymbek Instagram-daǵy paraqshasynda.
Sonymen birge ol joǵaryda atalǵan nysandardyń bári shtattyq rejımde jumys isteıtinin habarlady.
"Qalany aldaǵy ýaqytta da jylýmen jáne sýmen qamtamasyz etý úshin qýatyn arttyrý jáne jańa nysandar salý boıynsha júıeli jumys júrgizemiz. Máselen, bıyl taǵy bir "Telman" gaz jylý stansıasyn (1-kezek), "Turan" GJS ekinshi kezegin salamyz. Olar qalaǵa taǵy 850 Gkal/saǵ jylý qýatyn beredi. Qalany perspektıvaly túrde aýyz sýmen qamtamasyz etý úshin qazir sý qubyrynyń ekinshi jelisin salý jumysy júrip jatyr. Nura jerasty sý kózinen sý qubyryn jobalaý jáne Telman sorǵy stansıasyn keńeıtýdi jobalaý jumysy aıaqtalyp qaldy", - dep jazdy Astana ákimi.