Qorǵanys mınıstrliginiń qosymsha bilim berý mekemesi KAZCENT-te mınıstrdiń orynbasary general-leıtenant Sultan Kamaletdınov májilismendermen kezdesti, dep habarlaıdy almaty-akshamy.kz
Ortalyqpen tanysý konferens-zal men oqý korpýsynan bastaldy. Parlament Májilisiniń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan men depýtat Konstantın Avershınge KAZCENT qyzmetiniń negizgi baǵyttary týraly aıtyldy.
QR Qorǵanys mınıstrligi Bitimgerlik operasıalar ortalyǵynyń bastyǵy polkovnık Baýyrjan Nyǵmetýllın bitimgerlik qyzmetti odan ári damytý jáne keńeıtý týraly brıfıń ótkizdi. Ol qazaqstandyq bitimgerler qatysatyn mısıalardan habardar etip, suraqtarǵa jaýap berdi.
– Ortalyqtyń qyzmeti BUU aıasyndaǵy mısıalarǵa qatysý úshin Qarýly kúshterdiń áleýetin arttyrý mindetin qoıǵan Memleket basshysynyń tapsyrmalaryn oryndaý maqsatynda júrgiziledi. Sondyqtan áskerı qyzmetshilerdiń bitimgerlik jáne tildik daıyndyǵyna asa muqıat qaraımyz, – dedi Baýyrjan Nyǵmetýllın.
«Bitimger» oqý ortalyǵyna barǵan kezde májilismender BUU-nyń mısıalaryna qatysatyn ulttyq kontıngentti bitimgerlikke daıarlaý úderisimen, áskerı qyzmetshilerdi qarý-jaraqpen, áskerı tehnıkamen jáne múlikpen jaraqtandyrylýymen tanysty.