Qazaqstan Respýblıkasynyń Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde QHA-nyń eldegi qoǵamdyq kelisim men ulttyq tutastyqty saqtaýdaǵy erekshe rólin atap ótti. Bul týraly Aqshamnews.kz saıty habarlaıdy.
Memleket basshysy túrli jyldary elimizde qurylǵan qoǵamdyq dıalog alańdary men qurylymdardy atap óte otyryp, Assambleıanyń búginde ulttyq biregeılikti bekitýde teńdessiz basty platformaǵa aınalǵanyn erekshe belgiledi.
"Búgingi mereıtoılyq jıynda Assambleıanyń qoǵamdy ortaq maqsatqa jumyldyrý men ulttyq biregeılikti bekitý isinde balamasy joq basty platformaǵa aınalǵanyn jáne aldaǵy ýaqytta da solaı bolyp qala beretinin atap ótkim keledi", – dedi Toqaev.
Prezıdent Assambleıanyń tek qoǵamdyq ınstıtýt qana emes, memlekettigimizdiń negizin quraıtyn asa mańyzdy qurylym ekenin basa aıtty. Onyń aıtýynsha, bul QHA-ǵa artylatyn tarıhı jaýapkershiliktiń de zor ekenin bildiredi.
"Ulttyq múddelerimizdi qorǵap, egemendigimizdi nyǵaıtý – qasterli paryz. Muny Assambleıa músheleri tereń sezinedi dep oılaımyn", – dedi Memleket basshysy.
Qasym-Jomart Toqaevtyń bul pikiri Assambleıanyń róli tek etnosaralyq tatýlyqpen shektelmeı, eldik murattar men ulttyq tutastyqty nyǵaıtýǵa baǵyttalǵanyn kórsetedi.