Úkimet basshylary saýda-ekonomıkalyq, ınvestısıalyq, sý-energetıkalyq, tranzıttik-kólik, áskerı-tehnıkalyq salalardaǵy, AÓK, ónerkásiptik kooperasıa men densaýlyq saqtaýdaǵy yntymaqtastyqtyń ózekti máselelerin talqylady.
QR Premer-Mınıstri Asqar Mamın Qazaqstanǵa jumys saparymen kelgen Qyrǵyz Respýblıkasy Mınıstrler kabınetiniń Tóraǵasy – Prezıdenti ákimshiliginiń basshysy Aqylbek Japarovpen kelissóz júrgizdi, dep habarlaıdy Almaty-akshamy.kz Úkimettiń resmı saıtyna silteme jasap.
Ónerkásipte, aýyl sharýashylyǵynda, bilim berý men týrızmde ózara is-qımyldy odan ári keńeıtý úshin úlken áleýettiń bar ekeni atap ótildi. Sondaı-aq EAEO jáne basqa da ıntegrasıalyq birlestikter aıasyndaǵy yntymaqtastyq máseleleri qaraldy.
Ekijaqty taýar aınalymy 2021 jyldyń 9 aıynda $680 mln-nan asty, bul 2020 jyldyń sáıkes kezeńiniń kórsetkishinen 8,8%-ǵa jáne pandemıaǵa deıingi 2019 jyldyń toǵyz aıyndaǵymen salystyrǵanda 1,2%-ǵa joǵary. Taraptar saýda kólemin $1 mlrd deıin jetkizýge jáne satylatyn taýarlar men qyzmetter nomenklatýrasyn keńeıtýge nıetti.
Qazaqstan Qyrǵyzstan ekonomıkasynyń iri ınvestorlarynyń qatarynda. 2005 jyldan bastap Qazaqstannan Qyrǵyzstanǵa tikeleı ınvestısıalardyń jınaqtalǵan kólemi $1 mlrd-tan asady. Bıyl QR-daǵy qyrǵyz kásiporyndarynyń sany 1273-ten 1983 kompanıaǵa deıin nemese 55%-ǵa artty.
QR Premer-Mınıstri A. Mamın tranzıttik-kólik salasyndaǵy ózara is-qımyldyń oń qarqynyn atap ótti. Eki eldiń shekarasynda 7 avtomobıl ótkizý pýnkti jumys isteıdi. Osy jyldyń 17 qarashasynan bastap Nur-Sultan – Bishkek baǵyty boıynsha aptasyna 2 ret jıilikpen turaqty áýe reısi qalpyna keltirildi. Búgingi tańda elder arasynda aptasyna 11 reıs oryndalady.
Osy jyldyń 10 aıynda Qazaqstan aýmaǵy arqyly Qytaıdan Qyrǵyzstanǵa taýarlar tranzıtiniń kólemi 178 myń tonnadan 265,7 myń tonnaǵa deıin 1,5 ese ósti.
Úkimet basshysy eki eldiń sý-energetıka salasyndaǵy yntymaqtastyǵyna, sonyń ishinde Syrdarıa, Shý jáne Talas transshekaralyq ózenderiniń sý resýrstaryn retteý jónindegi jedel sharalardy birlesip qabyldaýyna joǵary baǵa berdi. Qyrǵyz tarapynyń Toqtoǵul sý qoımasynan qosymsha sý aǵyzýy Qazaqstannyń ońtústik óńirlerindegi sharýalardyń sý az kezde sýarmaly sýǵa degen qajettiligin qamtamasyz etýge múmkindik bergeni atap ótildi.
Kelissóz qorytyndysy boıynsha, Ortalyq Azıa aımaǵynyń qaýipsizdigin qamtamasyz etý sheńberinde Qyrǵyz Respýblıkasyna óteýsiz áskerı-tehnıkalyq kómek kórsetý týraly úkimetaralyq kelisimge qol qoıyldy. Eki eldiń densaýlyq saqtaý mınıstrlikteri arasynda Densaýlyq saqtaý salasyndaǵy referens-zerthanalardy damytý jónindegi 2021-2023 jyldarǵa arnalǵan sharalar josparyna qol qoıyldy.
Qazaqstan Respýblıkasynyń Saýda jáne ıntegrasıa mınıstrligi men Qyrǵyz Respýblıkasynyń Ekonomıka jáne komersıa mınıstrligi «Qarasý» jáne «Aqtilek» ótkizý pýnktteri aýdanynda ındýstrıalyq saýda-logıstıkalyq keshendi, sondaı-aq Qyrǵyz Respýblıkasynyń aýmaǵynda úsh kóterme-taratý ortalyǵyn qurý jáne olardyń jumys isteýi jónindegi birlesken is-sharalar josparyn qabyldady.
Aqylbek Japarovtyń Nur-Sultan qalasyna sapary aıasynda Memleket basshysy Qasym-Jomart Toqaevpen jáne QR Tuńǵysh Prezıdenti – Elbasy Nursultan Nazarbaevpen kezdesýleri, «Astana» halyqaralyq qarjy ortalyǵyna, Úkimettiń sıfrlyq keńsesine jáne basqa da nysandarǵa barýy josparlanǵan.