QR Aqparat jáne qoǵamdyq damý mınıstri Aıda Balaeva «Facebook» kompanıasynyń mınıstrlikpen birge jasalǵan málimdemeni teriske shyǵarýyna qatysty túsinik berdi, dep habarlaıdy almaty-akshamy.kz
««Facebook» kompanıasynyń birikken málimdemeni teriske shyǵarýyna qatysty buqaralyq aqparat quraldarynda «Meta» («Facebook») kompanıasynyń Azıa-Tynyq muhıty aımaǵy boıynsha Óńirlik keńsesiniń komýnıkasıalar jónindegi dırektory Ben MakKonehı myrzanyń (Ben McConaghy) teriske shyǵarǵan málimdemesine baılanysty Qazaqstan Respýblıkasy Aqparat jáne qoǵamdyq damý mınıstrligi kelesini habarlaıdy.
Aqparat jáne qoǵamdyq damý mınıstrligi negizgi kelissózderdi Gonkong qalasynda ornalasqan Qytaı, Mońǵolıa jáne Ortalyq Azıa óńiri boıynsha «Meta» («Facebook») kompanıasynyń óńirlik ofısimen júrgizdi. 1 qarashada jarıalanǵan birikken málimdemeniń mátini men onyń BAQ-da jarıalanýy atalǵan aımaqtyq keńseniń basshylyǵymen tolyqtaı kelisilgen bolatyn», - dep jazdy A.Balaeva Facebook-tegi paraqshasynda.
Eske salaıyq, keshe QR Aqparat jáne qoǵamdyq damý mınıstrligi ınternettegi zıandy kontentke qarsy is-qımyl máseleleri boıynsha Facebook-pen tyǵyz yntymaqtastyq týraly kelisimge kelgenin málim etken bolatyn.
«Qazaqstan Respýblıkasynyń Úkimetine aqparattyq keńistiktiń qaýipsizdigin arttyrý máselesin sheshýge kómek kórsetý maqsatynda Facebook Qazaqstanǵa ishki «Kontentti habarlaý júıesine» («Content Reporting System» (CRS)) tikeleı eksklúzıvti qoljetimdilik berdi. CRS mınıstrlikke Facebook jahandyq kontenttik saıasatynyń da, Qazaqstan Respýblıkasynyń ulttyq zańnamasynyń da buzýshylyqtary bar kontent týraly jedel habarlaýǵa múmkindik beredi. Qazaqstan Ortalyq Azıada kontenttik saıasatqa jaýap beretin Facebook kompanıasynyń halyqaralyq komandasymen tikeleı baılanys arnasyna jáne júıege qosylǵan alǵashqy el bolyp tabylady», - delingen edi mınıstrlik málimetinde.