Olar arnaıy oqý-jattyǵýǵa qatysyp jatyr.
Qazaqstandaǵy áskerı ushqyshtar qatary kásibı sheberlikterin arttyryp jatyr. Olar arnaıy uıymdastyrylǵan oqý-jattyǵýǵa qatysyp jatyr, dep habarlady Almaty-akshamy.kz.
«Aqtóbedegi eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri áskerı ınstıtýtynyń bazasynda armıa avıasıasy ushqyshtarynyń jıyny ótip jatyr», - delingen Qorǵanys mınıstrliginiń baspasóz qyzmetiniń habarlamasynda.
Jıynnyń praktıkalyq bóligi «Hlebodarovka» dalalyq áýe aılaǵynda uıymdastyryldy. Áskerı ınstıtýttyń avıasıa general-maıory Dáýren Qosanov ushýdy basqardy.
«Jóndeý-qalpyna keltirý jumystarynan soń áýe aılaq jaryq tehnıkalyq jabdyqtar keshenimen jáne áýe kemelerin qondyrýdyń radıolokasıalyq júıesimen jaraqtandyrylǵan. Bul túngi ýaqytta, kúrdeli meteorologıalyq jaǵdaılarda, onyń ishinde qar jamylǵan landshafta jáne aýa temperatýrasy tómen kezde ushýǵa daıyndyq sharalaryn júrgizýge múmkindik beredi», – dep atap ótti ınstıtýt bastyǵy.
Ushý sheberligi men daǵdyny arttyrýǵa baǵyttalǵan oqý-jattyǵý ushýlaryn armıa avıasıasynyń ekıpajdary Mı-8MT kóliktik-áskerı jáne Mı-35M jaýyngerlik tikushaqtarynda oryndaıdy.
Jıyn bir aı boıy ótedi. Osy kezeńde 30-dan astam ushqysh daıyndalady. Synaqtar tapsyrǵan ushý quramyna tıisti «3-synypty ushqysh», «2-synypty ushqysh», «1-synypty ushqysh» jáne «ushqysh-mergen» synyptyq biliktilikteri beriledi.