1993 jyldyń ekinshi sáýiri – Qazaqstannyń áskerı teńizshileri úshin erekshe kún. Bul kúni Qazaqstan Prezıdentiniń Jarlyǵymen Áskerı-teńiz kúshteri quryldy.
Qarýly kúshterdiń bul túri qalyptasý men damýdyń túrli kúrdeli ári dańqty kezeńinen ótti. Búgingi tańda eldiń Áskerı-teńiz kúshteri - memlekettiń teńizdegi qýaty, senimdi ári joǵary tehnologıalyq quramdas bóligi.
Áskerı-teńiz kúshteriniń bólimsheleri memlekettik shekarany qorǵaý, Aqtaý, Baýtıno, Quryq porttaryn, jasandy araldardy, Kaspıı teńiziniń qazaqstandyq sektoryndaǵy qubyrlar men ken oryndaryn kúzetý mindetterin oryndaıdy.
Áskerı-teńiz kúshteri zamanaýı zymyran-artıllerıamen, mına tartqysh korabldermen, gıdrografıalyq kemelermen jáne desanttyq katerlermen jabdyqtalǵan. Ótken jyly otandyq desanttyq «Shapshań» qaıyǵy iske qosyldy. Jyldam júzetin qaıyq teńizde operasıalar júrgizýge, jaǵalaýǵa desant túsirýge, olardy atyspen qoldaýǵa, medısınalyq evakýasıalaýǵa jáne apatqa ushyraǵandarǵa kómek kórsetýge arnalǵan.
Korablder ekıpajdaryn sheteldegi jetekshi áskerı oqý oryndarynda oqyǵan ofıserler basqarady. Byltyr áskerı teńizshiler Italıa men Túrkıa áskerı-teńiz kúshteriniń korablderi men kemelerinde taǵylymdamadan ótti. Olarǵa Úndistanda, Túrkıada, Pákistanda jáne Ońtústik Koreıada tildik kýrstar uıymdastyryldy.
Áskerı teńizshiler ózderiniń kásibı sheberligi men áskerı-teńiz daǵdylaryn «Birlestik» halyqaralyq oqý-jattyǵýynda, respýblıkalyq oqý-jattyǵýlarda jáne Kaspıı teńizi boıynsha jıyn-joryqtarda aıqyn dáleldep júr.
Jaýyngerlik ázirlikti nyǵaıtý, teńiz mashyǵyn jetildirý jáne ozyq tehnologıalardy meńgerý mindetterin oryndaı júrip, áskerı teńizshiler kásibı deńgeıin, jaýyngerlik daıarlyqty, berik rýhty jáne óz isterine adaldyqty kórsetýde.