Bul jańalyqta Ulttyq ulan bastamashy boldy.
Ulttyq ulan áskerı qyzmetshilerdiń tamaqtaný rasıonyna ulttyq taǵamdar qosyldy, dep habarlaıdy aqshamnews.kz
Bul týraly Ulttyq ulannyń Bas qolbasshylyǵynda Qorǵanys mınıstrligi, UQK, UQK Shekara qyzmeti jáne Tótenshe jaǵdaılar mınıstrligi tyl qyzmetteri ókilderiniń qatysýymen ótken dóńgelek ústel barysynda belgili boldy.
Jańartylǵan armıalyq rasıonǵa qazaqsha et, sirne, naýryz-kóje, naryn, kespe, baýyrsaq jáne basqa da dástúrli taǵamdar engiziledi.
"Áskerı tamaqtanýǵa ulttyq taǵamdardy engizý - bul aspazdyq jańalyq qana emes, áskerı qyzmetshilerimizdiń jaýyngerlik rýhyn nyǵaıtý men mádenı biregeıligin saqtaýdaǵy mańyzdy qadam", - dep atap ótti Ulttyq ulan Bas qolbasshysynyń tyl jónindegi orynbasary Erkebulan Hamıdýllın.
Usynylyp otyrǵan ózgerister aldyn ala Qazaq tamaqtaný akademıasymen kelisilgen. Sebebi kalorıasy men energetıkalyq qundylyǵy joǵary ulttyq taǵamdarmen baıytylǵan rasıon zat almasýdy, ımýnıtetti jaqsartýǵa jáne qarqyndy júktemeden keıin kúsh-qýatty qalpyna keltirýge yqpal etedi.
Bul bastama áskerı qyzmetshilerdiń densaýlyǵyn nyǵaıtyp qana qoımaı, olardy patrıottyq rýhta tárbıeleýde mańyzy ról atqarady.
Aıta ketsek, ótken jyly quqyqtyq tártip áskerlerinde jańartylǵan rasıonǵa aprobasıa júrgizildi. Ulandyqtar bul bastamany yqylaspen qarsy aldy. Olar dástúrli taǵamdardyń áskerı qyzmette qolaıly jaǵdaı jasap, psıhologıalyq kóńil-kúıdiń jaqsy bolýyna óz septigin tıgizetinin atap ótti.