Naýryz meıramy qarsańynda elordalyq avıabazada İİM áskerı-tergeý departamentiniń qyzmetkeri Baýyrjan Kamalıev MI-17 jaýyngerlik tikushaǵyn 15 metrge súırep, rekord ornatty, dep habarlaıdy Almaty-akshamy.kz Polisia.kz-ke silteme jasap.
Bul - polısıa qyzmetkeriniń resmı tirkelgen tórtinshi rekordy. Buryn ol eki lokomotıvti, 42 tonnalyq Airbus ushaǵyn jáne 10 jol talǵamaıtyn kólikti ornynan jyljytqan. Aqtyń molaıatyn, tirshiliktiń jańaratyn kezeńi – kóktem merkesine arnalǵan sharaǵa Qorǵanys mınıstri Rýslan Jaqsylyqov pen İshki ister mınıstri Marat Ahmetjanov qatysty. Eki vedomstvonyń basshylary sportshyny jańa jetistigimen quttyqtady. Palýanǵa Qazaqstan rekordtar kitaby uıymynyń atynan arnaıy sertıfıkat tabystaldy.
– Búgin barlyǵymyz Qazaqstan rekordynyń kýágeri bolyp otyrmyz. Kúshtik ekstrım salasyndaǵy belgili sportshy, İİM qyzmetkeri Baýyrjan Kamalıev bizdiń keńsemizge óziniń usynysymen shyqty. Ol buryn da óziniń rekordtarymen elimizge, álemge tanymal bolǵan. Biz mundaı sportshylardy árdaıym qoldaýǵa daıynbyz, – dedi Qazaqstan rekordtar kitabynyń resmı ókili Qýandyq Qudaıbergenov.
Palýan jańa rekordty jasamas buryn úsh aı daıyndalǵan. Onyń bazalyq sport túri – aýyr atletıka. Paýerlıftıngten elimizdiń sport sheberi ishki ister organdarynda 15 jyldan beri qyzmet atqaryp keledi. Aıta ketý kerek, shara barysynda Qorǵanys mınıstrliginiń Ortalyq ansambliniń ónerpazdary qonaqtarǵa arnap konserttik baǵdarlama usyndy. Sonymen qatar áskerılerdiń arasynda gir tasyn kóterip, AK-74 avtomatyn shashyp-jınaýmen jurtty tańǵaldyrǵandar da boldy.