Búginde qazaqtyń ulttyq buıymdaryn kúndelikti kıimmen úılestirý sánge aınaldy.
Zergerlerdiń dástúrin saqtaı otyryp, jastar jańa stıl týǵyzdy. Saýsaǵyna oıý-órnekti júzik, shashyna syldyrlaǵan sholpy taqqan qyzdardy kóshede jıi kezdestirýge bolady, dep habarlaıdy Almaty-akshamy.kz 24.kz-ke silteme jasap.
Qazaqtyń zergerlik buıymdaryna qyzǵýshylar qatary qalyń. Astanalyq jas zerger Nargız Qurmanǵazına baba murasyn zamanǵa saı jańǵyrtyp júr. Onyń kúmisten quıǵan áshekeıleri kópshilikke tanymal. Nargız Qurmanǵazına zergerlik buıymdardy eksklúzıvti etip jasaıdy. Iaǵnı, ár buıymnyń dızaınyn ózi oılap tabady. Oıý-órnekti zamanaýı stılmen úılestire biledi. Ásirese, qoshqar múıizdi oıýdy kóp qoldanady. Al sholpy men shashbaýǵa tarıhı tańbalar men injý tastar qosady.
«Men óner jáne dızaınmen kópten beri aınalysamyn. Zergerlik buıymdardy jasaýda qıalyma erik beremin. Mysaly, bul saqınaǵa kúmis pen mysty aralastyryp jasadym. Pishinin de ózim oılap shyǵardym», - deıdi jas zerger Nargız Qurmanǵazına.
Zerger qyz erekshe týyndylardy jasap qana qoımaı, isin brendke aınaldyrdy. Qazirde jas zergerdiń jumysy úlken suranysqa ıe. Ónerli jastyń turaqty tutynýshylary áshekeılerdiń kúndelikti kıimge erekshe stıl beretinin aıtady.
«Bul zergerlik buıymdardy sporttyq kıimmen de, klasıkalyq úlgidegi kıimmen de taǵýǵa bolady. Tipti kez kelgen shash úlgisine úılesedi. Ári onyń jasaǵan áshekeıleri basqa zergerlerdiń jumysynan ózgeshe», - deıdi qala turǵyny Aıym Ábildına.
Bir qyzyǵy, qazir jastar arasynda mundaı áshekeı taǵý sánge aınalǵan. Etnostıldiń ereksheligine tamsanbaıtyn jan joq.