Áskerı polıseıler «ArHO-2021» konkýrstaryna daıyndalýda
Qaraǵandynyń mańyndaǵy «Spassk» oqý-jattyǵý polıgonynda QR QK Áskerı polısıa bas basqarmasynyń komandasy bıyl Serbıada ótetin «Tártip saqshysy» baıqaýyna daıyndyqqa kiristi, dep habarlady Almaty-akshamy.kz QR Qorǵanys mınıstrliginiń taratqan habaryna silteme jasap.
Komanda quramy 6 adamnan turady. Oǵan dene jáne atys daıarlyǵynan joǵary kórsetkishterimen erekshelengen áskerı polısıa qyzmetkerleri kirdi.
«Tártip saqshysy» baıqaýy tórt kezeńnen turady. Birinshi kezeńde áskerı qyzmetshiler avtomat pen pıstoletten atý sheberlikterinen jaryssa, ekinshide juptasyp patrúl júrgizý mashyqtaryn kórsetedi. Olar turǵyndary bar aýyldarda shartty qarsylasqa atyspen shabýyl jasap saıysady. Úshinshi «Patrúldi narád» kezeńinde atys, medısınalyq daıyndyq, radıasıalyq, hımıalyq, bıologıalyq qorǵanys jáne granatty dáldep laqtyrý normatıvterin oryndaıdy. Oǵan ekstremaldy elementter arqyly patrúldik avtokólikti júrgize otyryp, quqyq buzýshyny shabýylyn toıtarý men ustaý kiredi.
– Eń qıyny jáne sońǵy sheshýshi synaq – «Júgirý» kezeńi. Buǵan uzyndyǵy 12 shaqyrymǵa sozylǵan tas joldaǵy tabıǵı jáne jasandy kedergilerdi eńserý kiredi, – dedi komanda jattyqtyrýshysy, polkovnık Vıtalıı Fedorov.
Alǵash ret «Tártip saqshysy» baıqaýy 2017 jyly Armıa halyqaralyq oıyndary aıasynda ótkizilip, bizdiń komanda ekinshi oryn alǵan bolatyn.
