15 qarasha – Ulttyq valúta kúni jáne qarjy júıesi qyzmetkerleriniń kásibı merekesi. Búginde esep-qısaptyń jiligin shaǵyp, maıyn ishken maıtalman mamandar jeterlik. Solardyń biri – Ulttyq ulannyń Almatydaǵy «Ońtústik» óńirlik qolbasshylyǵyna qarasty Baýyrjan Momyshuly atyndaǵy 5571 áskerı bóliminde qyzmet atqaratyn qarjy bóliminiń ofıseri leıtenant Gúljan Baımuhanova.
Bul sala aldymen muqıat bolýdy talap etedi. Óıtkeni sandar qateleskendi keshirmeıdi. Al sol sandardy «saırata» bilgen sala mamany búginde Ulttyq ulannyń sapynda abyroımen qyzmetin atqarýda.
Gúljan Baǵdatqyzy Qaraǵandy oblysynyń týmasy. 2000 jyldan beri Almaty qalasynda turady. Almaty ekonomıkalyq kolejin qarjy mamandyǵy boıynsha, odan joǵary oqý ornyn bitirgen. 2009 jyly qazaq áskeriniń aldyńǵy shebi sanalatyn Ulttyq ulan qataryna shaqyrylady. Sáıkesinshe áskerı qyzmetshilerge qoıylatyn talap ta, tártip te qarjy mamanyna qatar qoıyldy. Náp-názik bolmysqa ıe keıipkerimiz oılanbastan er azamattarmen qatar ıyq túıistirip, Otan úshin tıtteı de bolsyn qosqan úlesim dep qyzmetke kirisedi. Áskerı Jarǵyǵa baǵynady. Otan aldyndaǵy áskerı Antty da qabyldaıdy.
Onyń bul salaǵa bet burýyna anasynyń tikeleı qatysy bar. Óıtkeni anasy uzaq jyldar qarjy mamany bolyp jumys istedi. Esinde, bala kúninde anasy túnimen qat-qat qaǵazdardyń ortasynda maı shammen, esepshotty sart-surt qaǵyp uzaq otyratyn.
– Osy ýaqytqa deıin túsingenim, adamnyń taǵdyryna jazylǵany bolady eken. Qyzyǵy, meniń armandar tizbegimde áskerı adam bolý múldem bolmaǵan. Ádette pogon taqqan, forma kıgen jandarǵa kópshilik qyzyǵady ǵoı. Al, meniki kerisinshe, qyzmetke kiriskennen keıin ǵana mamandyǵymdy súıe bastadym. Iá, basynda qyz balasy úshin ońaıǵa soqpady. Óıtkeni, er azamattar syndy zont kıip, okop qazyp, qatal talap pen tártipke baǵyndyq. Sodan esh jaman bolǵan joqpyz, óstik, óndik, úırendik. Otbasymyzda da, bala tárbıesinde de osy jaqtan kórgen túıgenimizdi, ómirlik sabaqtarymyzdy qoldanyp kelemin, – deıdi leıtenant Gúljan Baımuhanova.
Ómirlik serigin de osy saladan jolyqtyrdy. Sonaý 2009 jyly Ulttyq ulanǵa qabyldanǵan kezde qatardaǵy jaýynger boldy. Sol tusta kelisimshart boıynsha áskerı qyzmetshilerdi qadaǵalaıtyn, bilmegenin úıretetin jaýapty basshysy praporshık Ermek Baımuhanov edi. Sol basshysy qazir adal jar, shańyraǵanyń tiregi, eki qyzynyń ákesi. Azamaty turǵanda Gúljan úshin esh nárse qıyn emes.