Qazaqstan Respýblıkasy Syrtqy ister mınıstriniń orynbasary Álibek Qýantyrov jáne «Kazakh Invest» UK» AQ basqarma tóraǵasynyń orynbasary Madıar Sultanbek Qazaqstandaǵy «Mitsubishi Corporation» bas dırektory Tesýıa Sýgıtamen kezdesý ótkizdi.
Kelissózder barysynda Á.Qýantyrov Qazaqstannyń jańa ınvestısıalyq saıasaty odan ári eksportqa basa nazar aýdara otyryp, qosylǵan quny joǵary óndiristerdi damytýǵa baǵyttalǵanyn atap ótti. Osyǵan baılanysty ozyq japon tehnologıalary kadrlyq jáne tehnologıalyq áleýetti nyǵaıtýda mańyzdy ról atqara alady, dep habarlaıdy aqshamnews.kz Syrtqy ister mınıstrligine silteme jasap.
Kezdesý barysynda «Mitsubishi Corporation» ókilderi turaqty damý men kómirtegi izin azaıtýǵa baǵyttalǵan 2024 jylǵy korporatıvtik strategıasyn usyndy. Kezdesý aıasynda qazaqstandyq tarapqa sýtegi tehnologıalaryn paıdalaný úshin ınfraqurylym qurý jáne jańartylatyn energetıka salasynda sheshimder ázirleý sıaqty perspektıvaly jobalar usynyldy. Osyǵan baılanysty, kompanıanyń energetıkalyq ınovasıalarǵa, sıfrlyq transformasıaǵa jáne joǵary tehnologıalyq óndiriske beretin mańyzy Qazaqstannyń tómen kómirtekti ekonomıkany damytý jónindegi maqsattaryna tolyq sáıkes keledi.
Taraptar ornyqty damý salasyndaǵy yntymaqtastyqtyń negizgi baǵyttaryn, onyń ishinde energetıka sektorynda, ınfraqurylymda jáne ónerkásipte ozyq tehnologıalardy engizý men jobalardy iske asyrýdy talqylady. «Mitsubishi Corporation» ókilderi kompanıanyń Qazaqstandaǵy qatysýyn keńeıtýge jáne óńirdiń turaqty damýyn qoldaýǵa baǵyttalǵan jańa bastamalardy iske asyrýǵa qyzyǵýshylyq bildirdi. Buǵan deıin «C5+Japonıa» bıznes-forýmy aıasynda «Mitsubishi Corporation» kompanıasy «Central Asia Climate Foundation» jáne «Rakurs Tech LLC» kompanıalarymen ózara túsinistik týraly memorandýmǵa qol qoıdy.
Kezdesý qorytyndysy boıynsha taraptar kompanıanyń energetıkalyq jáne sıfrlyq transformasıa salasyndaǵy jahandyq bastamalaryn eskere otyryp, yntymaqtastyqty damytýǵa kelisti.
Anyqtama: 1993 jyldan bastap «Mitsubishi Corporation» Qazaqstanda úsh ókildik ashty. Elimizde jumys istegen jyldary korporasıa birqatar ınvestısıalyq jobalardy iske asyrýǵa qatysty: «Batys Qazaqstandaǵy avtomobıl joldaryn ońaltý», «Qyzylorda qalasyn sýmen jabdyqtaýdy qaıta qurý jáne jaqsartý», «Temir joldardy jóndeý úshin tehnıka jetkizý» jáne t.b. Tokıo qalasyndaǵy bas keńseniń málimetinshe, korporasıa «Teńizshevroıl» jáne «Aqtóbemunaıgaz» kompanıalaryna korozıaǵa qarsy turaqtylyǵy joǵary 30 myń tonna bolat qubyr jetkizgen. Adamı resýrstardy damytý jónindegi qyzmet sheńberinde «Mitsubishi Corporation» zamanaýı jabdyqtarmen jabdyqtalǵan QBTÝ-dyń birneshe oqý jáne ǵylymı zerthanalarynyń ashylýyna demeýshilik jasady.