Qazirgi tańda Konstıtýsıalyq Keńes úlken ózgerister toptamasyn qarastyryp jatyr. Eldiń Ata Zańyna 30-ǵa jýyq túzetýler engizildi. Bul ózgerister saıası júıeden bastap eldiń qurylymy ózgertýge deıingi máselelerdi qamtıdy.
Konstıtýsıadaǵy zańdar azamattarymyzdyń ómirin jaqsartyp, ár adamnyń baqytty bolashaǵyn qalyptastyrýǵa baǵyttalǵan. Biz ózimiz úshin ǵana emes, urpaǵymyz úshin shańyraǵy bıik, keregesi keń, tabaldyryǵy berik Jańa Qazaqstandy qurýǵa daıynbyz. Ol úshin áleýetimiz de, kúshimiz de, jigerimiz de jetedi. Biz tarıhı sátterde bir jeńnen qol, bir jaǵadan bas shyǵaratyn halyqpyz. Endigi kezekte saıası reformalardy aıaǵyna deıin júrgizýimiz mańyzdy. Bul reformalardyń máni men maqsatyn halyqqa durys túsindirý ortaq boryshymyz.
Sebebi, kez kelgen tarıhı sáttiń oryn alýy qashanda halyqtyń shynaıy qoldaýyna ıe bolǵanda ǵana júzege asady. Osy oıymdy barlyq etno-mádenı birlestikterdiń jetekshileri qoldaıtynyna esh kúmánim joq. Sondyqtan bul baǵytta elge janashyr, memleketshil, otanshyl azamattardyń kúsh-jigerin biriktirý qajet dep esepteımin. Assambleıanyń qurylymdary men músheleri aldyńǵy sapta bolýy kerek. Biz bul máselege Assambleıanyń ǵylymı sarapshylyq keńesiniń de kúshin jumyldyramyz.
Ata Zańymyzdyń aıbyny asqaqtaı bersin, Konstıtýsıa kúni qutty bolsyn!