Jaqsylyq Úshkempirov atyndaǵy jekpe-jek saraıynda ulttyq kúresten ótken "Dala qyrandary" reıtıńtik týrnıri segiz salmaq dárejesinde Qazaqstannyń eń myqty degen balýandaryn anyqtady, dep habarlaıdy aqshamnews.kz.
QR Qorǵanys mınıstrliginiń málimetinshe, boz kilemde Armıa ortalyq sport klýbynyń sportshylary Nurdáýlet Baqtybaıuly men qatardaǵy jaýynger Erasyl Janataev joǵary nátıje kórsetti.
Jyl bastalǵaly beri Qazaqstanda qazaq kúresinen bes reıtıńtik jarys ótti. Olardyń qorytyndysy boıynsha ár salmaq dárejesinde eń kóp upaı jınaǵan segiz balýan anyqtaldy.
Jarys barysynda kilemge birneshe dúrkin Álem chempıondary, V Dúnıejúzilik kóshpendiler oıyndary men Dúnıejúzilik jekpe-jek oıyndarynyń jeńimpazdary, Azıa kýbogynyń ıegerleri, "Qazaqstan barysy" týrnıriniń jáne buǵan deıingi "Dala qyrandary" týrnırleriniń jeńimpazdary shyqty.
Jarys qorytyndysy boıynsha segiz sportshy "Dala qyrandary" týrnırinde "Bas balýan" ataǵyna ıe boldy. Onyń júlde qory 100 000 dollar.
Armıa sportynyń ókilderi eki salmaq dárejesinde jeńiske jetti. Qarýly kúshterdiń qyzmetkeri Nurdáýlet Baqtybaıuly 82 kg salmaqta jáne merzimdi qyzmet sarbazy Erasyl Janataev 90 kg salmaq dárejesinde jeńis tuǵyrynan kórindi.
– Meniń oıymsha, bul jaqsy nátıje. Bizdiń eki sportshy chempıon atandy, – dedi Armıa ortalyq sport klýby qazaq kúresi komandasynyń bastyǵy leıtenant Asan Mámbetqulov. Bul sportshylar aldaǵy tamyz aıynda qazaq kúresinen áskerı qyzmetshiler arasyndaǵy alǵashqy CISM álem chempıonatynda Qarýly kúshterdiń namysyn qorǵaıdy.