Memleket basshysy Cybaılas jemqorlyqqa qarsy is-qımyl agenttiginiń tóraǵasy Asqat Jumaǵalıdy qabyldady
Prezıdentke Sybaılas jemqorlyqqa qarsy qyzmettiń byltyr atqarǵan jumysynyń nátıjeleri jóninde esep berildi.
Qasym-Jomart Toqaevqa ótken jyly jemqorlyqqa qatysty 1692 qylmys tirkelip, 1324 adam áshkerelengeni baıandaldy. Onyń 161-i túrli deńgeıdegi basshylar. 1221 is sotqa jiberildi.
Agenttik tóraǵasynyń aıtýynsha, 2022 jyldan beri memleketke jáne kvazımemlekettik sektor sýbektilerine 1,02 trıllıon teńge (2,2 mlrd AQSH dollarynan astam) kóleminde múliktik aktıvter men qarajat qaıtarylǵan.
Memleket basshysyna birqatar qylmystyq isti tergeý barysy týraly málimet berildi. Atap aıtqanda, «ÓKM» operatory» JSHS-ne qatysty aıaqtalǵan qylmystyq ister boıynsha Qostanaı jáne Qaraǵandy oblystaryndaǵy jalpy quny shamamen 20 mıllıard teńge bolatyn 2 zaýyt memleket menshigine ótti. Q.Satybaldyulyna qatysty sotqa deıingi tergeý amaldary aıasynda bıyl aqpan aıynda búdjetke taǵy da shamamen 82,6 mıllıard teńge (185 mln AQSH dollary) tústi. Budan bólek, Aqmola oblysynyń Qosshy qalasyndaǵy 942 gektar jer ýchaskesi memleketke qaıtaryldy. Onyń naryqtyq quny 13 mıllıard teńgeden asady.
Sonymen qatar Prezıdentke memlekettik satyp alý portalyna monıtorıń júrgizý barysynda 41,3 mıllıard teńge kólemindegi búdjet qarajatynyń maqsatsyz jumsalýyna jol berilmegeni jaıynda aıtyldy. Atap aıtqanda, Sybaılas jemqorlyqqa qarsy qyzmet mamandandyrylǵan HQKO-larda avtokólikterdi tirkeý kezindegi qýlyq jasaý joldaryn anyqtady. Memlekettik baj salyǵy men avtomobılderdi tirkeýden túsken tólemderdiń basym bóligi aqparattyq júıelerdiń jumysyndaǵy olqylyqtarǵa baılanysty búdjetke túspegen. Agenttiktiń usynystary boıynsha kemshilikter joıylǵannan keıin 2023 jyly búdjetke túsken túsimder (2022 jylmen salystyrǵanda) 9 ese ulǵaıyp, 91,4 mıllıard teńgeni qurady. Osy rette eki jylda da tirkelgen avtokólikterdiń sany birdeı bolǵan.
Asqat Jumaǵalı sportty qarjylandyrý salasyndaǵy sybaılas jemqorlyq táýekelderine syrtqy taldaý júrgizilip jatqanyn, tekserý barysynda búdjet qarajatynyń tıimsiz bólinýine, sonyń ishinde sybaılas jemqorlyq syn-qaterlerine baılanysty áreketter anyqtalǵanyn aıtty. Tek osy jyldyń ózinde Agenttik atalǵan saladaǵy jymqyrý faktileri boıynsha 18 qylmystyq isti tirkegen.
Budan bólek, «SK «Farmasıa» JSHS qyzmetin taldaý jumystary aıaqtaldy. Munda da medısınalyq preparattar men jabdyqtardy satyp alýǵa qatysty aıtarlyqtaı jemqorlyq táýekelderi anyqtaldy. Áleýmettik mańyzy bar problemaly obektilerdiń qurylys barysyn qadaǵalaý nátıjesinde búkil el boıynsha 32 ǵımarat pen nysan salyndy.
«Sybaılas jemqorlyqqa qarsy volonterlik» jobasy aıasynda somasy 2 mıllıard teńgeden asatyn taýarlar men qyzmetterdiń baǵasyn kóterý táýekelderine jol berilmedi, 10 myńǵa jýyq azamatqa tegin quqyqtyq kómek kórsetildi.
Ulttyq banktiń «Sıfrlyq teńge» jobasy arqyly «aqshany boıaý» tetigin engizý máselesi pysyqtaldy. Qazirgi ýaqytta Sıfrlyq teńge pılottyq rejımde Almaty qalasyndaǵy mektepterdiń birinde iske asyrylyp jatyr.
Qabyldanǵan keshendi sharalardyń nátıjesinde Qazaqstan 2023 jyldyń qorytyndysy boıynsha Transparency International (Sybaılas jemqorlyqty qabyldaý ındeksi) reıtıńinde 8 pozısıaǵa kóterilip, 180 eldiń arasynda 93-orynǵa turaqtady.
Kezdesý sońynda Qasym-Jomart Toqaev sybaılas jemqorlyqqa qarsy is-qımyldardy jáne aldyn alý sharalaryn kúsheıtýge baǵyttalǵan júıeli jumystardy jalǵastyrý jóninde birqatar naqty tapsyrma berdi.