Talqylaý barysynda halyqaralyq jáne álemdik tájirıbeler negizge alynady.
Bul týraly Antikor.Live jobasynda Bilim jáne ǵylym mınıstri aıtty, dep habarlaıdy Almaty-akshamy.kz mınıstrliktiń baspasóz qyzmetine silteme jasap.
Mektep dırektorlaryn rotasıalaý bir ákimshilik-aýmaqtyq birlik sheginde júzege asyrylatyn bolady. Vedomstvo basshysy rotasıa ınstıtýtyn engizý – dırektorlardy taǵaıyndaýdyń jańa júıesi, olardy atestattaý, jalaqy men eńbek jaǵdaıyn arttyrýmen qatar basqarý sapasyn jaqsartýdyń tıimdi tetikteriniń biri ekenin atap ótti.
«Jalpy, álemdik tájirıbe kórsetip otyrǵandaı, kadrlardy jańartý, rotasıalaý óte mańyzdy. Qazir kópshilik óz pikirlerin bildirip jatyr. Olardyń arasynda «erteń búkil el boıynsha 7500 dırektor bir mezette jumys ornyn aýystyrady» dep jatqandar da bar. Negizinde, olaı emes. Máselen, Pavlodar oblysynda jumys istep júrgen adam Qaraǵandy oblysyna nemese Qaraǵandy oblysynan Túrkistan oblysyna jiberilmeıtini túsinikti. Qazir biz tek bir ákimshilik-aýmaqtyq birlik sheginde ǵana aıtyp jatyrmyz. Rotasıalaý boıynsha naqty krıterııler anyqtalady. Biz ózgelerdiń bul tetikti óz múddeleri úshin paıdalanylýyna jol bermeýimiz kerek», – dep atap ótti Bilim jáne ǵylym mınıstri.
Mınıstr búgingi tańda vedomstvo ókilderi sarapshylarmen birlese dırektorlardy rotasıalaý erejelerin talqylap jatqanyn aıtty. Keıin mektep dırektorlaryn rotasıalaý boıynsha naqty krıterııler anyqtalady.
«Qazir áriptesterimizben birge dırektorlardy rotasıalaý erejelerin talqylap jatyrmyz. Biz halyqaralyq jáne álemdik tájirıbeni zerttedik. Túpkilikti sheshim barlyǵynyń pikirin eskere otyryp qabyldanady. Osyndaı jańa ınstıtýttardy engizý kezinde «zıan keltirme» qaǵıdasyn ustaný mańyzdy. Iaǵnı, barlyq táýekeldi eskerip, rotasıaǵa arnalǵan negizderdi naqty reglamentteý qajet», – dep atap ótti Asqat Aımaǵambetov.