Qarjylyq monıtorıń agenttigi (QMA) aýqymdy alaıaqtyq sqema týraly málimet taratty. Asar Baspana qarjy pıramıdasynyń uıymdastyrýshylary Týǵanbaev pen Baıtasov myńdaǵan azamattyń aqshasyn aldap, orasan zor paıda tapqan.
Qarjy pıramıdasy tutynýshylyq kooperatıv retinde jasyrynǵan. Kompanıanyń naqty óndiristik qyzmeti bolmaǵanyna qaramastan, uıymdastyrýshylar 86 myń adamdy ózderiniń sqemasyna tartqan.
Alaıaqtar Asar Baspana Almatyda qurylys materıaldaryn óndiredi, tigin sehy jáne turmystyq tehnıka men medısınalyq jabdyqtar shyǵaratyn zaýyty bar dep sendirgen. Alaıda, shyn máninde, olar tek óz brendiniń logotıpin daıyn taýarlarǵa japsyrýmen shektelgen.
QMA málimetinshe, Týǵanbaev pen Baıtasov ondaǵan myń adamdy aldap, 12,4 mıllıard teńgeni qaltalaryna basqan. Olar aı saıyn 30%-ǵa deıin paıda túsedi dep ýáde bergenimen, bul jalǵan sóz bolyp shyqty. Alaıaqtar 3,8 mıllıard teńgeni jeke qajettilikterine jumsap úlgergen.
2024 jyldyń jeltoqsanynda, salymshylar kúmándana bastaǵanda, uıymdastyrýshylar jańa avtobıznes ashyldy jáne iri dılerlermen seriktestik ornatyldy degen jalǵan aqparat taratqan. Biraq tergeý barysynda kólikterdiń salymshylardyń aqshasyna satyp alynyp, Týǵanbaevtyń týystarynyń atyna rásimdelgeni belgili boldy.
2025 jyldyń aqpanynda alaıaqtyq áreketter áshkerelenip, Týǵanbaev óz komandasyna Asar Baspana saıtynyń jumysyn toqtatýdy buıyrǵan.
9 aqpanda QMA qyzmetkerleri 49 keńse men 81 kúdiktiniń turǵylyqty jerine tintý júrgizdi. Tergeý barysynda serverlik málimetter qalpyna keltirildi.
Tárkilengen múlik:
- 1,1 mıllıard teńge,
- 10 qymbat kólik,
- Aqtaýda, Týǵanbaevtyń baýyrynyń úıinen tabylǵan 945 mıllıon teńge.
Sonymen qatar, banktegi 1,2 mıllıard teńge buǵattaldy.
11 aqpanda Týǵanbaev pen Baıtasov eki aıǵa qamaýǵa alyndy. Tergeý amaldary jalǵasýda.