Búgin Qazaqstan Respýblıkasynyń Bas prokýratýrasy jáne İshki ister mınıstrliginiń Interpol qyzmetkerlerimen, Qazaqstannyń Túrkıadaǵy Elshiliginiń qoldaýymen qylmystyq jaýapkershilikke tartý maqsatynda Túrkıa Respýblıkasynan Qazaqstan azamaty ekstradısıalandy.
Kúdikti 2022-2023 jyldar aralyǵynda Almaty qalasyndaǵy komersıalyq uıymnyń býhgalteri bola otyryp, tólem tapsyrmalaryna jalǵan málimetter engizý arqyly ózine senip tapsyrylǵan 27 mıllıon teńgege jýyq aqshalaı qarajatyn zańsyz ıemdengen, dep habarlaıdy aqshamnews.kz Bas prokýratýraǵa silteme jasap.
Qylmys jasaǵannan keıin kúdikti jasyrynǵan, osyǵan baılanysty ol halyqaralyq izdeýge jarıalandy.
Aǵymdaǵy jyldyń tamyz aıynda ol Túrkıa aýmaǵynda ustalyp, sodan keıin Qazaqstan Bas prokýratýrasynyń suraýy boıynsha qazaqstandyq quqyq qorǵaý organdaryna berildi.
Qazirgi ýaqytta atalǵan adam Astana qalasynyń tergeý ızolátoryna qamaldy.
Atalǵan qylmysty jasaǵany úshin múlki tárkilenip, jeti jyldan on eki jylǵa deıingi merzimge bas bostandyǵynan aıyrý jazasy qarastyrylǵan.