Atom elektr stansıasyn salý boıynsha referendým qarsańynda óńirde túsindirý jumystary qarqyn alyp keledi. Búgin A.S.Pýshkın atyndaǵy oblystyq kitaphanada sala mamandary turǵyndardyń saýaldaryna jaýap berdi.
Qazirgi ýaqytta qoǵamda qyzý talqylanyp jatqan AES máselesine D.Serikbaev atyndaǵy SHQTÝ-dyń sáýlet, qurylys jáne energetıka mektebiniń dekany, qaýymdastyrylǵan profesor, PhD doktory, QR qurmetti energetıgi Aıbek Aqaev túsinikteme berdi.
«AES – jasyl energetıkanyń bir túri jáne onyń mańyzy zor. Qazaqstan ýran qory boıynsha álemdegi kóshbasshy elderdiń biri bolǵandyqtan, bul resýrsymyzdy paıdalaný mańyzdy. Halyq arasynda nege jańartylatyn energıa kózderin damytpaımyz degen suraqtar týyndap jatyr. Bul sala da damyp keledi, alaıda onyń qýaty shekteýli. Mysaly, jel elektr stansıalarynyń qýat koeffısenti 35%, kún elektr stansıalarynyń qýaty 18% ǵana. Al AES qýat koeffısenti 90%-ǵa deıin jetedi, bul ony tıimdi jáne turaqty energıa kózine aınaldyrady», – dep túsindirdi Aıbek Aqaev.
Onyń aıtýynsha, AES salý tehnologıalaryn usynatyn birneshe el bar, jáne solardyń ishinde 4 kompanıa ǵylymı-tehnologıalyq áleýeti negizinde tańdalyp alynǵan. Qurylys barysynda qaýipsizdikke erekshe mán berilip, burynǵy apattardan sabaq alynady. Almaty qalasyndaǵy Iadrolyq fızıka ınstıtýtynyń zertteýleri boıynsha, AES-tiń zıany óte tómen ekendigi dáleldengen.