Astananyń qylmystyq ister jónindegi aýdanaralyq sotynda burynǵy mádenıet jáne sport mınıstri Arystanbek Muhamedıulyna qatysty taǵy bir qylmystyq is qaralyp jatyr.
Bul joly eks-mınıstr reıderlik áreket jasady dep aıyptalǵan. Qylmystyq is elordadaǵy «Dıplomat» qonaqúıine qatysty qozǵalǵan, dep habarlaıdy Almaty-akshamy.kz Halyq-uni.kz-ke silteme jasap.
2023 jyldyń 3 qarashasynda ótken sot otyrysynda Arystanbek Muhamedıuly ótinishhat joldap, is boıynsha sotta kýálik etkenderdiń birin qylmystyq jaýapkershilikke tartýdy surady.
«Proses barysynda sotty mensinbeıtinderdiń áreketine kýá boldyq. Tek shyndyqty aıtamyn dep ant bergender sotta jalǵan, shyndyqqa sáıkes kelmeıtin málimdemeler jasady. Qylmystyq istiń reıderlik, laýazymdy ókiletin teris paıdalaný boıynsha qaralyp jatqany habarlanyp jatyr, al jábirlenýshiler men kýágerler uıalmaı jalǵan sóıleýmen boldy. Jeke basym men otbasymdy qorlaıtyn sózder aıtyp jatyr. Jáberlenýshi áıelim ekeýmiz týraly «dva sapoga para», ulymdy «alqash», áıelimniń anasyn «kári, esi durys emes» dep atady. Kýáger Z.K. «Dıplomat» qonaqúıin Serik Qarymsaqov basqarǵanyn birneshe ret aıtty. Soǵan qaramastan Serik Qarymsaqovtyń qonaqúıge kirýine meniń tyıym salǵanymdy aıtady. Alaıda málimdemesine qatysty bir de bir dálel keltirmedi.
Taǵy bir kýáger D.M. qyzmetkerlerden osy jaǵdaı týraly estigenin aıtty. Ol 2020 jyldyń qarashasynan bastap BALI spa ortalyǵyn Serik Qarymsaqovtyń basqarǵanyn aıtty. BALI spa-nyń «Dıplomat» qonaqúıi qurylymy ekenin aıtyp otyr. Logıka qaıda? Meniń Serik Qarymsaqovtyń kirýine tyıym salǵanymdy aıtady, biraq ózi uıymdastyrý-qarjylyq máseleniń bárin Qarymsaqov sheshkenin aıtty. D.M.-dy qylmystyq jaýapkershilikke tartýdy suraımyn», - dedi Arystanbek Muhamedıuly sotta.
Sondaı-aq Muhamedıulyn ótinishhattyń ekinshi bóliginde aıyptaý tarapynyń kýágerlerinen jaýap alýdy toqtatyp, isti ári qaraı jalǵastyrýdy surady. Ózinen jaýap alýǵa qarsy emes ekenin bildirdi.
İsti qarap jatqan sýdıa Ábınur Qarabaev kýágerlerdiń jaýabyna úkim shyǵaratyn kezde keńesý bólmesinde baǵa beriletinin aıtty.
Eger sot olardyń jalǵan kýálik etken dep tanysa, qosymsha qaýly shyǵarylyp, olardy jaýapkershilikke tartý týraly sheshim shyǵarady, - dedi sýdıa Ábınur Qarabaev.
Al ótinishhattyń ekinshi bóligine qatysty sýdıa memlekettik aıyptaýshyǵa óz tarapyn dáleldeýge múmkindik berý kerek ekenin, taraptardyń bárine qulaq asý qajet ekenin aıtty.
Prokýror qaı kýágerden jaýap alý-almaý týraly sheshimdi ózi qabyldaıdy. Tipti kýágerlerdiń bir bóligin qysqarta alady. Sondyqtan barlyq kýágerden jaýap alamyz. Arystanbek Muhamedıuly kez kelgen ýaqytta sotta jaýap bere alady, - dedi sýdıa.
Arystanbek Muhamedıuly kýágerlerdiń naqty dálelge súıenip jaýap berýin surady.
Aıta keteıik, Arystanbek Muhamedıuly qylmystyq kodekstiń 24-baby 3-bóligi – 249-baby 1-bóligi (reıderlik áreketke oqtalý), 28-baby 3-bóligi – 250-baby 1-bóligi (ókiletin teris paıdalaný arqyly qylmystyq quqyq buzýshylyqty uıymdastyrý) boıynsha aıyptalyp otyr.
2023 jyldyń 28 qyrkúıeginde prokýror Haırýllaev aıyptalýshylarǵa qatysty aıyptaý aktisin oqydy.
Buǵan deıin burynǵy mádenıet jáne sport mınıstri Arystanbek Muhamedıuly 8 jylǵa bas bostandyǵynan aıyryldy. Arystanbek Muhamedıuly 28-baptyń 3-bóligi (qylmysty uıymdastyrý) jáne 189-baptyń 4-bóligi 2-tarmaǵynda (asa iri mólsherdegi senip tapsyrylǵan bótenniń múlkin urlaý) kózdelgen quqyq buzýshylyqty jasaǵany úshin kináli dep tanyldy.
Sodan keıin eks-mınıstrge shyqqan úkim apelásıalyq sot alqasynda qaralyp, ózgerissiz qaldy.