Ol sot otyrysyna №64 mekemeden onlaın rejımde qatysady.
Astanada Arystanbek Muhamedıulyna qatysty basty sot otyrysy bastaldy, dep habarlaıdy Almaty-akshamy.kz.
Sot otyrysy Baıqońyr aýdandyq №2 sotynda ótip jatyr. İsti sýdıa Baǵlan Ydyrysov qaraıdy.
"Búgin sottalýshy aýa raıyna baılanysty onlaın qatysady, keıin oflaın rejımde qatysady", - dedi sýdıa Baǵlan Ydyrysov.
Arystanbek Muhamedıuly 2022 jylǵy mamyrda qamaýǵa alynǵan. Ol kezde Muhamedıuly ulttyq mýzeıdi basqaryp turǵan edi. 28 mamyrda sot sanksıasymen Muhamedıulyna qamaýda ustaý túrindegi bultartpaý sharasy taǵaıyndaldy.
Sybaılas jemqorlyqqa qarsy qyzmet "Álem murajaılary boıynsha altyn adam sherýi" halyqaralyq kórmesin ótkizý boıynsha memlekettik satyp alý týraly shart sheńberinde 146 mıllıon teńge mólsherinde búdjet qarajatyn jymqyrý deregine qatysty ulttyq mýzeıdiń laýazymdy tulǵalaryna jáne basqa da adamdarǵa qatysty tergeýdi bastady.
Shildede Sybaılas jemqorlyqqa qarsy qyzmet agenttigi ókilderi ulttyq mýzeıdiń burynǵy basshylyǵyna jáne basqa da adamdarǵa qatysty 2017-2018 jyldary "Aqparattyq resýrstarda nysandardy tanymal etý úshin jalpyulttyq tizbege engizilgen nysandardyń 3D-modelderin qurý" jobasyn iske asyrý kezinde asa iri mólsherde búdjet qarajatyn urlaý deregi boıynsha tergeý júrgizilip jatqanyn málimdedi. Resmı derekter boıynsha tergelip jatqan qylmystyq ister boıynsha memleketke keltirilgen zalaldyń aldyn ala somasy shamamen 7 mıllıard teńge bolady.