Astanada Arystanbek Muhamedıulynyń isi boıynsha sot bastaldy.
Ulttyq mýzeıdiń burynǵy dırektory Arystanbek Muhamedıuly tergeý ızolátorynda qalady.
Sýdıa Arystanbek Muhamedıuly aýyr qylmys jasady dep aıyptalyp otyrǵanyn, tergeý sýdıasynyń sheshiminen sottalýshynyń bostandyqta bolýy isti obektıvti qaraýǵa kedergi jasaýy múmkin ekenin atap ótti, dep habarlaıdy Almaty-akshamy.kz Egemen.kz-ke silteme jasap.
Sottyń pikirinshe, Muhamedıulynyń syrqaty bultartpaý sharasyn ózgertýge negiz bola almaıdy. Sottalýshy medısınalyq kómekti tergeý ızolátorynda da ala alady.
«Sot advokat Tóleevtiń Muhamedıulynyń bultartpaý sharasyn úıqamaqqa aýystyrý týraly ótinishin qanaǵattandyrýdan bas tartý týraly sheshim qabyldady», - dedi sýdıa Baǵlan Ydyrysov.
Arystanbek Muhamedıulyna jaqynda ekinshi ret ota jasalǵany aıtylǵan edi.
Ótken jyldyń 29 mamyrynda Ulttyq mýzeı dırektory Arystanbek Muhamedıuly qamaýǵa alynǵany belgili boldy. Oǵan halyqaralyq kórmelerge bólingen 140 mıllıon teńgeden astam qarjyny jymqyrdy degen aıyp taǵyldy.