Táýlik boıy temirjoldardy qardan tazartý jumystary júrgizilýde.
QTJ-nyń barlyq qurylymdyq bólimsheleri qardyń, borannyń jáne qatty jeldiń oryn alýy jaǵdaılarynda júk pen jolaýshylardy qaýipsiz tasymaldaýdy qamtamasyz etedi, dep habarlaıdy Almaty-akshamy.kz Elorda.info-ǵa silteme jasap.
Aýa raıynyń qolaısyzdyǵyna baılanysty «Jolaýshylar tasymaly» AQ qar qursaýynda qalǵan adamdardy shyǵarýdy uıymdastyrdy.
Ereımentaý stansıasynan áıelder men egde jastaǵy 40-tan astam jolaýshy Astanaǵa poıyzben jetkizildi. Sondaı-aq, elordadan Semeı, Shymkent, Túrkistan jáne Petropavl baǵytynda júretin poıyzdarǵa qosymsha vagondardy tirkeý boıynsha jedel sharalar qabyldandy.
«Poıyzdardyń ótýin qamtamasyz etý úshin táýlik boıy temirjoldardy qardan tazartý jumystary júrgizilýde. Qarmen kúreske baǵyttalǵan ınfraqurylymnyń barlyq resýrstary jumyldyryldy. Magıstraldyq jeliniń Kókshetaý, Qostanaı, Pavlodar, Qaraǵandy jáne Aqtóbe bólimsheleri aýmaqtarynda temirjol tósemin qardan tazartý boıynsha úzdiksiz jumystar júrgizilýde. Ótken táýlikte arnaıy qar tazalaý tehnıkasynyń kómegimen 430 shaqyrymnan astam temirjol tósemi tazartyldy», - delingen habarlamada.