Sanaýly saǵattardan keıin qasıetti Qadir túni bastalady.
Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly barsha musylmandy Qadir túnimen quttyqtady, dep habarlaıdy Almaty-akshamy.kz
Bıyl myń aıdan da qaıyrly Qadir túni 17 sáýirden 18 sáýirge qaraǵan túnge túsip tur. Iaǵnı búgin kún batqan ýaqyttan bastap Qadir túni kiredi.
Múftıattyń aqparatynsha, qasıetti túni Astana men Almatyda barlyq meshit jumys isteıdi.
Alla Taǵala Quranda: "Biz shynynda, Qurandy Qadir túninde túsirdik. Qadir túniniń ne ekenin bilesiń be? Qadir túni (qasıet jáne saýap jaǵynan) myń aıdan da qaıyrly. Sol túnde perishtiler jáne Jábireıil Allanyń ámirimen (jer betine Alla taǵdyr etken) barlyq isterdi atqarý úshin túsedi. Sol bir tún, aǵaryp tań atqanǵa deıin amandyq-tynyshtyq túni bolady" dep baıandaıdy.
"Rasynda, Ramazan aıynyń qasıetti bolýynyń uly erekshelikteriniń biri – Qadir túninde taǵdyrdyń jazylýy. Al Qadir túniniń qasıetti bolýynyń máni – adamzat balasyn eki dúnıe baqytyna jeteleýshi qasıetti kitabymyz Qurannyń túsýi. Buǵan tutastaı osy qasıetti túnge qatysty baıandalǵan "Qadir" súresi dálel bolady", - deıdi bas múftı quttyqtaýynda.
Onyń aıtýynsha, Qadir túni namaz ben Quran oqýdyń saýaby mol. Sonymen qatar Alladan kóbirek keshirim surap, duǵa jasaý kerek.
Sondaı-aq qasıetti túni "Alla, rasynda, Sen keshirimdisiń jáne keshirgendi jaqsy kóresiń. Meni keshire kórshi" dep duǵa tilegen abzal. Hadısterdiń birinde: "Kim de kim Qadir túni ımanmen jáne saýabyn úmit etip qulshylyq etse, onyń aldyńǵy kúnálary keshiriledi" delingen.
"Alla Taǵala barshamyzdyń qate-kemshiligimizdi keshirip, óz meıirimine bólegeı. Rabbymyz Qadir keshinde shynaıy ımanmen jasaǵan duǵalarymyzdy, namazdarymyzdy, bergen sadaqalarymyzdy, oqyǵan Quranymyzdy qabyl etip, saýabyn eselep jazǵaı", - dep tiledi Naýryzbaı qajy Taǵanuly.
Qadir keshi kún batyp, aýyz ashqan sátten bastap tań atatyn ýaqytqa deıin jalǵasady.